Dalin çmimet e reja nga Bordi i Transparencës, nafta do të shitet me 228 lekë, 5 lekë më lirë! Bie edhe benzina, shitet 208 lekë litri

Çmimi i naftës dhe i benzinës është ulur këtë të mërkurë nga bordi i Transparencës.

Prej pasdites së sotme nafta do të blihet në pikat e karburantit 5 ;lekë më lirë e konkretisht 228 lekë, ndërsa benzina do të kushtojë 208 lekë litri nga 209 lekë që ishte deri në orën 16.00 të kësaj të mërkure.

Ndërkohë bordi ka lënë të pandryshuar çmimin e gazit në 115 lekë litri, por këtu Bordi i transparencës kërkon që gazi të kushtojë më pak për familjarët pasi nuk  është pjesë e akcizës.

Brenda çmimit që paguajnë qytetarët për karburantin përveç taksave 12 lekë për çdo litër është marzhi i fitimit që kanë kompanitë e pakicës. Ky marzh fitimi është përcaktuar me një tjetër akt normativ që ndryshon vendimin e parë për ngritjen e bordit dhe administrimin e karburanteve. 

Sipas të dhënave të bordit nafta me shumicë do tregtohet me 216 lekë litri, benzina me 196 lekë litri dhe gazi me 103 lekë, ndërsa kompanitë e shumicës marzhin e fitimit e kanë 3 lekë/litri.

Këto çmime të reja të naftës, benzinës dhe gazit do të jenë në fuqi deri në mbledhjen e ardhshme të bordit, për të cilën ende nuk është përcaktuar një datë.
Pikat e karburantit janë të detyruara të respektojnë këto çmime të përcaktuara nga bordi pasi në të kundërt përballen me gjobë, pezullim të licencës e deri në sekuestrim të pikës së karburantit.

K.T./Sh.Sh/Shqiptarja.com

TAG:
• rritja e cmimit të naftës
• bordi i transparences