Debate në Komisionin e Media
për p/ligjin e mediave Audiovizive

TIRANE - Deputetët e Komisionit të Medias u përfshinë sot në debate mbi rolin e grupit ekspert të punës dhe varësinë e tyre nga politika. Në program ishte diskutimi i nenit 51 të projektligjit për Mediat Audiovizive, i cili përfshin licencat dhe çështje të tjera teknike. Për këtë, deputeti socialist Alfred Dalipi kërkoi që të thirreshin disa ekspertë të tjerë, duke gjykuar se grupi i punës i krijuar nga KKRT, nuk ka pavarësinë e nevojshme për shkak se paguhet nga qeveria. Dhe kjo ka ngjallur reagimet e deputetëve të djathtë.

“Jo për të ndryshuar grupin e punës , për të shtuar mundësinë e vendimmarrjes, dhe e treta vendimin po e marrim nga njerëz që janë në marrëdhënie pune financiare vetëm me mazhorancën. Në këtë grup pune nuk mund të klonohen pa mendimin e këtij komisioni dhe e pesta unë nuk mund të pranoj një ekspertizë një ngjyrëshe.”, u shpreh Dalipi.

Deputetët e Partisë Socialiste u ankuan në komision se KKRT po ndryshon vazhdimisht grupin e ekspertëve, pa marrë miratimin e Komisionit, gjë të cilën sipas tyre nuk ka autoritetin e nevojshëm.

“Jo, këta të shkretë këta kanë qenë punonjës të administratës, që po i trajtoni sikur nuk janë këtu, po i vendosni ngjyra sipas qejfit,po i ngarkoni me krimin që janë punonjës të kësaj administrate, unë jam I bindur që kanë qenë përpara rotacionit politik të kësaj administrate dhe do vazhdojnë të jenë dhe ky nuk është një kërcënim.”

Kryetarja e Komisionit, Valentina Leskaj nuk pranoi kërkesën e socialistit Dalipi për ekspertë të tjerë, me arsyetimin se duhej të krijohej një standard. Duke parë se ishte e pamundur për të ndalur diskutimet, Leskaj mbylli mbledhjen, ndonëse deputetët vazhduan të diskutonin mes tyre. Të vetmit që nuk morën fjalën ishin pikërisht të akuzuarit, ekspertët e grupit të punës.

(im/Shqiptarja.com)