Debate në Kom. Ekonomisë për
heqjen e fondit pushtetit vendo

TIRANE - Komisioni Parlamentar i Ekonomisë miratoi aktin normativ përmes të cilit Qeveria i heq pushtetit vendor një pjesë të fondeve për të shlyer detyrimet që ujësjellësit kanë ndaj kompanisë CEZ. Bëhet fjalë për fondin e transfertave të pakushtëzuara për të cilat ligji shqiptar i njeh pushtetin vendor autonomi të plotë në mënyrën e shpenzimit.

Punimet e komisionit të Ekonomisë nisën menjëherë me debate. Deputeti socialist Arben Malaj akuzoi Ministrinë e Financave se po kthehet në përmbaruese e CEZ. Ndërsa deputeti Erjon Braçe pyeti zv/ministrin e Financave Nezir Aldeda në ç’pikë është zbatimi i kontratës mes CEZ dhe Qeverisë pas njoftimeve për heqje të licencës nga Enti Rregullator.

“Në ç’fazë është realizimi i kontratës sepse ka 4 ditë 5 ditë që është paralajmëruar heqja e licensës nga enti rregullator i energjisë për këtë kompani dhe mua me intereson sistemi.”, -tha Braçe.

“Je jashtë teme, ju tani keni lexuar gazetën dhe tani vini i frymëzuar me çfarë lexoni në media, rri i fokusuar në fushën tonë. Nuk do diskutojmë kontratën e privatizimit të shtetit me CEZ-in.”, - ka replikuar Edmond Spaho ndaj deputetit socialist Braç.

Ndërkaq Mimi Kodheli është shprehur se gjendja sipas saj është katastrofike.

Opozita akuzoi mazhorancën se propozon një zgjidhje që transferon krizën nga një institucion në një tjetër pa e zgjidhur atë.

“Nëse Ministria e Financës në vendin tonë do të marrë atributin shtesë të përmbaruesit a e keni bërë këtë edhe për zinxhirin e borxheve të këqija që kanë kompanitë ndaj njëra-tjetrës dhe private. Se nëse e bëni këtë vetëm për CEZ mundoheni të fshihni problemet e thella që ka që nuk i ka vetëm CEZ por edhe detyrimet uji, dritat, taksave në Shqipëri. Nuk po e zgjidhni problemin, po trashëgoni.”, u shpreh Arben Malaj.

Deputeti i PS-së Arben Ahmetaj deklaroi se shkak i borxheve të grumbulluara që nga 2007 është keqmenaxhimi i gjithë sistemit, por kryetari i komisionit, demokrati Edmond Spaho replikoi duke akuzuar kolegun socialist se fajin e kanë njerëzit si puna e tij që nuk paguajnë faturat.

“Mbaj qetësi , rregullo fjalorin, je rrugaç…”, ishin fjalët e Spahos drejtuar deputetit socialist.

Kjo ka bërë që dy deputetët të përfshihen në një seri akuzash të ndërsjellta për vjedhje.

Nga ana tjetër, mazhoranca e cilësoi aktin normative si të keqen më të vogël dhe akuzoi deputetët e opozitës se thonë vetëm jo duke mos ofruar asnjë zgjidhje.

(im/Gre.m/Shqiptarja.com)