Konflikti i 7 majit në Sarandë që përfundoi me vrasjen e pronarit të karburantit dhe kryetarit të shoqatës “Çamëria”, Rexhep Ismaili, dyshohet se ndodhi për një debat mes 31-vjeçarit Kostandin Vogli, i cili mbeti i plagosur, dhe tezes së tij, e cila rezulton të jetë gruaja e Viktor Ruçit, personit që “skuadra” prej 6 personash u nisën për ta rrahur. Report Tv mundi të sigurojë dëshmitë e plota të dy të arrestuarve, për të cilët të hënën u dha masa e sigurisë, “arrest në burg” për Voglin dhe “arrest në shtëpi” për Ruçit. Në deklarimet e tij, Ruçi përmend debatin që gruaja e tij ka pasur me nipin, Kostandin Vogli, për pagesën për punën në restorantin e tij në Krorëz.

Viktor Ruçi: Unë të qartësoj se shtetasi Kostandin Vogli është nipi i bashkëshortes sime. Bashkëshortja ime ka punuar te restoranti i Kostandinit, në vendin e quajtur Krorëz. Në përfundim të sezonit, pas llogarive, është debatuar për një sasi të hollash, pasi nuk i kishin bërë llogaritë mirë dhe ka qenë një konflikt midis nipit dhe tezes së tij.

Përpara konfiktit të rëndë që ndodhi rreth orës 21:30 të së enjtes, atë pasdite, Viktor Ruçi dhe Kostandin Vogli, patën një takim rastësor të tensionuar, nga i cili nuk pati sqarim, por vetëm ndezje të gjakrave. 

Kostandin Vogli: Në vendin e quajtur “Lokali i Mishit” kam ndaluar dhe kam marrë paketë cigare. Kur kthehem te makina, shikoj në brendësi burrin e tezes, Viktor Ruçi. Mentalisht u stepa dhe i kam thënë: ‘Dil nga makina, të kam ndonjë borxh?’. Në ato momente më ka dhënë çelësin e makinës, pasi e kishte hequr nga vendi ku ishte, dhe më thotë: ‘Ik pak më lart që të sqarohemi’. Unë dola nga makina dhe i thashë: ‘Sqarohemi këtu, s’kemi pse lëvizim’. Në ato momente marr vëllain tim, Margaritin, në telefon dhe i them se më ka hyrë Viktor Ruçi në makinë. Në atë moment është afruar Lili, i cili është pronari i dyqanit të mishit, dhe aty u zbut muhabeti. Në atë moment unë i kam thënë Viktorit: ‘Do të vij te karburanti të të takoj bashkë me vëllain tim’.

Viktor Ruçi: Shkova ku qëndroi makina dhe shikoj Kostandinin që, pasi bleu diçka në supermarket dhe doli, unë isha në anën e jashtme të makinës nga ana e pasagjerit. Ai u fut në makinë dhe unë hyra në anën e pasagjerit. Shikoj që ai u shtang nga prania ime dhe i them: ‘Mos u tremb, se dua të sqarohem’. Ai më thotë: ‘Dil nga makina, nuk dua të sqarohem’. Unë i them që kam diçka për të sqaruar dhe dal nga ana e shoferit dhe i them: ‘Hajde të pimë një kafe’. Ai nuk pranoi dhe vjen Lili, së bashku me Albanën, bashkëshorten e tij, dhe më thotë: ‘Çfarë ke me djalin?’. Unë i them që është nipi i nuses sime.

Pasi u ndanë, Kostandin Vogli tregon thurjen e planit për të takuar Viktorin me plotë të tjerë. Me vete morën edhe 3 shkopinj, çka tregon synimin për ta dhunuar.

Kostandin Vogli: Kam marrë vëllain tim Margaritin dhe i kam thënë të mos nisej, se po vij. Në Nivicë, te lokali i Poli Gjonit, takova Lulëzim Tabakun, shokun tim, dhe i thashë: ‘A ke folur gjë me Margaritin?’, dhe ai më tha: ‘Jo, nuk kam folur’. Unë shkova në shtëpi, diskutova me vëllain tim dhe mora 3 shkopinj, dhe me makinën tip “Porsche” jemi nisur për në Gjashtë për të takuar Viktorin. Kur po bisedonim, Luli na tha: ‘Para nesh po na presin edhe makina të tjera’. Unë isha para me makinë, Lulëzimi ishte me motor pas meje dhe makinat e tjera na ndoqën, të cilat unë nuk i njihja se kush ishin. Unë isha makina e parë dhe kam ndaluar te hyrja e lokalit të të ndjerit Rexhep.

Vogli tregon daljen jashtë kontrollit të konfliktit, të cilin e nisi vetë me goditje me shkopë dhe sharje.

Kostandin Vogli: Aty kam zbritur bashkë me vëllain, me shkop në dorë, dhe e kam sharë dhe goditur me shkop, por nuk e ka zënë shkopi. Në përleshje e sipër, pasi nuk kuptoja se çfarë po bëhej, dëgjova një të bërtitur: ‘Nori, kallash!’. Futa kokën te dera e pasme e pasagjerit dhe u futa brenda. Shikoj që nga ana e lokalit ishte një person me kallash në dorë dhe kam zbritur nga makina. Kam shkuar në drejtim të rrugës, nga ana e karburantit, dhe kam ndier që u godita në këmbë.

Viktor Ruçi deklaron se pa dikë që i drejtoi pistoletën, por që nuk e njihte. Nga frika, u kyç në banjën e lokalit dhe nga aty doli kur gjithçka kishte mbaruar, moment që mori vesh edhe vrasjen e Rexhep Ismailit. 

Viktor Ruçi: Vijnë dy makina para lokalit, dhe shikoj që nga makina e parë del Kostandini me vëllain Margaritin dhe u drejtuan drejt tavolinës me shkopinj në dorë. Mu drejtua mua dhe më goditi me shkop. Unë kam marrë karrigen dhe jam mbrojtur dhe kam shkuar në drejtim të lokalit, në brendësi. Në atë moment kam parë një person të tretë, i cili ishte me pistoletë në dorë dhe ma drejtoi në një largësi rreth 3 metra. Personin nuk e njoha. Unë u futa në tualet dhe kam marrë në telefon djalin tim, Dorifan Ruçi, dhe i them: ‘Merr policinë se po na qëllojnë’. Kur isha brenda në banjë dëgjova krisma dhe në këtë kohë vjen Mandi dhe më thotë: ‘Dil jashtë se vranë Rexhepin’. 

Në sherr e sipër, 66-vjeçari Rexhep Ismaili është futur brenda lokalit dhe ka dalë me kallashnikov, duke hapur zjarr disa herë ku ka mbetur i plagosur Kostandin Vogli. Ndërsa autori i dyshuar, Lulëzim Tabaku, e ka qëlluar me pistoletë me plumb në kokë Ismailin. Pas ngjarjes, autorët janë larguar me shpejtësi.

Lajmi në përditësim....