Dega e PD Shkodër akuza Ramës: Po vonon emërimin e drejtorëve sepse pret që bandat të bien në ujdi

SHKODER- Dega e PD Shkodër ka akuzuar kryeministrin Edi Rama se po vonon emërimin e drejtorëve rajonalë në Shkodër sepse pret që bandat të bien në ujdi.

Në një deklaratë të bërë pak pas përfundimit të mbledhjes së kreut të qeverisë me drejtuesit e këshillit drejtues të qarkut të veriut, PD Shkodër shprehet se pasi turpëroi Shkodrën duke i kandiduar një trafikant droge të dënuar në Itali, po vonon emërimin e drejtuesve sepse për të ka rëndësi vetëm pushteti personal.

Deklarata e plotë e PD Shkodër

Është e turpshme dhe e dënueshme përdhosja që po i bën Edi Rama qytetit të Shkodrës.

Pasi i turpëroi socialistët e Shkodrës duke i kandiduar për Kryetar Bashkie, pa i pyetur, një trafikant droge të dënuar në Itali, Edi Rama ka rreth 2 muaj që ka lënë Shkodrën pa drejtorë rajonal, sepse pret që bandat të bien në ujdi për të ndarë pushtetin.

Nuk ka rëndësi për Edi Ramën se çfarë mendojnë qytetarët e Shkodrës. Nuk ka rëndësi për Edi Ramën se çfarë mendojnë socialistët e ndershëm të Shkodrës. Nuk ka rëndësi për Edi Ramën që Shkodra ka djem dhe vajza të talentuar, të arsimuar mirë dhe të aftë për të drejtuar administratën publike lokale.

Për të ruajtur pushtetin e tij personal, për Edi Ramën ka rëndësi vetëm vazhdimi i marrëveshjes së bashkëqeverisjes me krimin e organizuar në Shkodër. Shkodra nuk ka për t’ia falur këtë! Edi Rama duhet të mësojë se me Shkodrën as nuk mund të tallet dhe as nuk mund të luajë!

Partia Demokratike Dega Shkodër i bën thirrje qytetarëve të Shkodrës, pa asnjë dallim politik, të përbuzin këtë model qeverisjeje, ta refuzojnë fuqimisht tentativën e Edi Ramës për të veshur me pushtet krimin në Shkodrën e kulturës dhe dijes.

Shqipëria dhe Shkodra ka vetëm një rrugë! Të ndahen nga krimi, të refuzojnë të keqen, dhe të punojmë bashkarisht për Shqipërinë si gjithë Europa!

/Shqiptarja.com

TAG:
• edi rama
• bashkia e shkodres