Degradon mozaiku i Muzeut, Labi:
E administron Ministria e Kulturës

Mozaiku në ballinën e Muzeut Historik Kombëtar me sipërfaqe rreth 31 metra katrorë po shkon drejt shkatërrimit përfundimtar. Edhe pse i ka kushtuar qeverisë së mëparshme Berisha një tender me 1.5 milionë lekë për restaurimin, këto pamje janë një tregues shumë i qartë se fondet e taksapaguesve shqiptarë nuk i ka thithur mozaiku. Përkundrazi nga plasaritjet që kanë nisur menjëherë pas restaurimit, ky mozaik ka thithur vetëm ujë. Kamera e Report TV ka fokusuar gurët e rënë, plasaritjet e shumta, deformimet e figurave dhe mjaft plasaritje që po e cojnë drejt degradimit mozaikun.

Drejtori i Muzeut Kombëtar, Melsi Labi sqaron për Shqiptarja.com se bashkohet me shqetësimin e gjendjes në të cilën ndodhet mozaiku i fasadës së muzeut, por fatkeqësisht, institucioni i tij nuk mund të ndërhyjë, pasi nuk administrohet prej tyre.

“Mozaiku “Shqipëria Sot” nuk është nën administrimin e Muzeut Kombëtar, por të një drejtorie të Ministrisë së Kulturës. Prej vitesh unë si drejtues i institucionit kam kërkuar që përgjegjësia e menaxhimit të kësaj vepre të kalojë pranë Muzeut Kombëtar, por kjo kërkesë nuk është pranuar. Unë bashkohem me shqetësimin se gjendja e mozaikut është jo e mirë dhe duhet ndërhyrje, por në këto kushte ligjore dhe administrative, nuk mund të ndërhyjmë, veçse të bashkohemi me zërat që ngrenë si shqetësim dëmtimin e tij”-tha Melsi Labi.


Mozaiku u ndërtua 35 vjet më parë jetë, në vitin 1981 nga pesë artistë, Vilson Kilica, Aleksandër Filipi, Agim Nebiu, Josif Droboniku dhe Anastas Kostandini. Edhe pse iu përshtat artit të frymëzuar nga realizmi socialist, autorët theksojnë se mozaiku duket të qëndrojë për vlerta artistike dhe kujtesën historike në këtë muze. Pamja që shikojmë nuk aspak dinjitoze për institucionin më rëndësishëm të vendit, muzeun historik kombëtar.



 Foto të tjera

Redaksia Online
(Shqiptarja.com)