Dekriminalizimi, 'lëshon' Basha:
 'Ok' propozimeve të PS dhe LSI

TIRANE- Partia Demokratike duket se është tërhequr nga panegociueshmëria e draftit të saj për dekriminalizimin, duke i përcjellë një mesazh mazhorancës që në projektligj të reflektohen edhe propozimet e PS-LSI. Kryetari i Partisë Demokratike, Lulzim Basha ka kërkuar dje në mbledhjen e përjavshme të grupit parlamentar, se opozita nuk kërkon merita në këtë proces, por konsensusin e shumicës parlamentare, për të konkretizuar me vullnet të përbashkët procesin e dekriminalizimit.

“Dëshirojmë miratimin me konsensus të këtij projektligji duke reflektuar në të kontributet e grupeve parlamentare të Partisë Socialiste dhe Lëvizjes Socialiste për Integrim. Nuk duam meritat, duam të bëhet ligji, të zbatohet ligji. Dekriminalizimi ka apo duhet të ketë vetëm një kundërshtar: krimin”, u shpreh Basha. Edhe pse ka “lëshuar” për përqasjen e dy drafteve, pa përmendur nëse tërheqja përfshin edhe 5 pikat që mbajnë larg palët, shefi i opozitës deklaroi se s’do ketë asnjë afat shtesë për miratimin e projektligjit, duke kërkuar votimin e tij brenda muajit shtator. “Dekriminalizimi, si hap i parë, është sot një urgjencë kombëtare.

Ne kemi paraqitur në Kuvend projektligjin tonë të konsultuar me komisionin e Venecias. Kemi kërkuar futjen e projektit në kalendarin e Kuvendit dhe vendosjen e një afati për miratimin e tij brenda muajit shtator. Por nga ana tjetër, po ndjekim me vëmendje çdo lëvizje apo manovër politike që synon zvarritjen e miratimit të ligjit, tjetërsimin e tij për t’i hequr thelbin, për ta bërë të paefektshëm e të pafuqishëm, pra të pavotueshëm.

Busulla është standardi evropian”, tha kreu demokrat. Ai kërkoi me insistim miratimin e projektligjit dhe fillimin menjëherë të zbatimit të tij, me qëllim pastrimin e Kuvendit, institucioneve dhe pushtetit vendor nga individët me rekorde kriminale. Gjithashtu, kreu demokrat Basha iu rikthye edhe akuzave ndaj ministrit të Brendshëm, Saimir Tahiri për lidhje me trafikun e drogës.

“Ka venë makinën e tij në dispozicion të trafikantëve, e ka shndërruar veturën e tij në mjetin më të sigurt e më të paprekshëm të trafiqeve në vend. Habilajt, kushërinj të Tahirit, të njohur dhe të survejuar nga policia si narkotrafikantë me damkë, kanë hyrë e kanë dalë në kufinjtë dhe doganat e vendit me makinën e ministrit kushëri”, tha ai. Raporti i ODIHR për zgjedhjet e 21 qershorit ishin gjithashtu një tjetër çështje ku u ndal Basha, duke kërkuar reflektimin e rekomandimeve të OSBE/ODIHR në Kodin Zgjedhor. 


Shkrimi u botua në Shqiptarja.com (print) në 23 Shtator 2015

Redaksia Online
(d.a/shqiptarja.com)  

TAG:
• OSBE