Garda e Republikës ka shmangur përgjegjësinë e saj për dëmshpërblimin financiarit të familjarëve të 4 civilëve të vrarë në demonstratën e 21 janarit përpara kryeministrisë, duke ja faturuar përgjegjësinë Policisë së Shtetit.
 
Me këtë argument, juristët e Gardës së Republikës, janë vetëmbrojtur në Gjykatën Administrative të Tiranës, duke pohuar se barra e dëmshpërblimit i takon Policisë së Shtetit dhe jo Gardës, pasi policia nuk ka bërë mirë detyrën, duke braktisur detyrën dhe lënë demonstruesit të hyjnë në një territor të rëndësisë së veçantë, që ruhet me ligj nga Garda e Republikës.
 
Në argumentet e tyre, juristët e Gardës së Republikës, argumentojnë se:“…garda u detyrua të përdorte armët e zjarrit pas shpërthimit të portës hyrëse…”. Këtë qëndrim Garda e Republikës e ka mbajtur gjatë zhvillimit të gjykimit për dëmshpërblimin e familjarëve të Ziver Veizit, i cili u vra shumë pranë portës hyrës të kryeministrisë.
 
Garda: Dëmshpërblimin ta bëjë Policia
Përmes këtij dokumenti Garda e Republikës kundërshtohen në Gjykatën Administrative, paditë e familjarëve të të ndjerit Faik Myrtaj dhe të familjarëve të Ziver Veizit. Së pari, Garda kërkon rrëzimin e padisë duke kujtuar se, në korrik të 2014-s, kryeministri Rama ka urdhëruar ngritjen e një grupi për vlerësimin e dëmit dhe, për sa kohë ka nisur një proces i tillë, paditësit duhet të prisnin një përgjigje. Duke shpjeguar vendimin e Gjykatës së Apelit, Garda citon se sulmi i protestuesve ka qenë i ashpër dhe efektivët e Gardës legjitimoheshin në përdorimin e armëve. “Mendojmë se Garda e Republikës nuk mund të përgjigjet për këtë dëm, pasi nëse efektivët e policisë do të kryenin detyrën më 21 janar 2011 duke shpërndarë turmën, atëherë sigurisht nuk do të kishte qenë e nevojshme që Garda të përdorte armët, e si pasojë e këtij përdorimi të vinin viktimat. Në asnjë rast nuk duhet të harrohet tensioni, stresi dhe goditjet që kanë qenë të vazhdueshme. Përgjegjës për këtë situatë është po aq, në mos më shumë sesa Garda, Policia e Shtetit, pasi paaftësia për menaxhimin e demonstruesve solli viktimat”.
 
Të rrëzohet padia civile
Më tej, Garda e Republikës kërkon që të rrëzohet kërkesa, duke iu referuar precedentit të 2001-shit në Genova, kur një protestues u vra nga Karabineria gjatë takimit të G8-s. “Momenti i parë që del nga ky gjykim është ai, që familjarët e viktimës i adresohen shtetit italian për pagimin e dëmeve, dhe jo Karabinierisë apo Policisë së Shtetit italian”. Garda argumenton më tej duke iu referuar edhe dosjes “Gërdeci”, pasi sipas këtij institucioni, nga praktika e deritanishme është operuar me vendime të Këshillit të Ministrave për dhënie ndihme. “Ky kërkim është i pabazuar,- e mbyll qëndrimin e saj Garda, - dhe në rast se gjykata e pranon padinë, vendimi nuk mund të ekzekutohet, pasi Garda dhe Ministria e Brendshme e kanë miratuar buxhetin për 2016-n dhe ai nuk mund të ndryshojë”-ka argumentuar juristi i Gardës së Republikës.

Redaksia Online
Shqiptarja.com