Dënimi në Itali, Valdrin Pjetri reagon pas dokumenteve që nxori PD-ja: Pres verifikimet

Kryetari i ri i bashkisë së Shkodrës Valdrin Pjetri ka reaguar për herë të parë pas dokumenteve që nxori PD-ja ku tregohet se ka qenë dënuar në Itali në vitin 2003 me 18 muaj burg dhe një mijë euro gjobë për shpërndarje droge.

Pjetri mohon vërtetësinë e dokumentit të kuesturës së Firences. Ai thotë se e vërteta e vetme është certifikata që ai publikoi pak ditë më parë. Megjithatë Pjetri shprehet se pret me padurim vendimin përfundimtar për procesin e verifikimit të figurës që po bëhet nga prokuroria.

"Unë të vërtetën time e deklarova para kandidimit si dhe para pak ditësh me dokumente zyrtare. E vetmja e vërtetë është ajo që del nga zyrat e agjencive të zbatimit të ligjit dhe jo nga foltoret e PD.

Pres me padurim vendimin e përfundimit të procesit të verifikimit të figurës nga ana e autoriteteve zyrtare shqiptare dhe italiane" deklaron ai.

Gazment Bardhi publikoi disa dokumente sipas tij kartela e nxjerrë nga kuestura e Firences, që tregon se kryebashkiaku i Shkodrës Valdrin Pjetri ka qenë dënuar në Itali me 18 muaj burg dhe një mijë euro gjobë për drogë. Bardhi u shpreh se Pjetri e ka pranuar krimin pas arrestimit në 27 janar 2003 së bashku me Altin Dodën.

TAG:
• dekriminalizimi
• gazmend bardhi
• valdrin pjetri