Deputeti gjerman: PD të hyjë në zgjedhje, djegia e mandateve e gabuar

Deputeti i Bundestag-ut, njëkohësisht Kryetar i Komisionit për Çështje të Bashkimit Evropian, Christian Petry në një takim me gazetarët nga ambasada gjermane, i ka bërë thirrje PD-LSI dhe partive të tjera opozitare që të hyjnë në zgjedhjet e 30 qershorit.

"Me të gjithë përfaqësuesit që takova mbështeta bindjen time që procesi ti kthehet normalitetit dhe promovova në mënyrë të vazhdueshme idenë e pjesëmarrjes në zgjedhje të të gjitha forcave politike në veçanti të PD. Është vendim i lirë i çdo subjekti politik për të marrë apo jo pjesë në zgjedhje, nëse procesi zhvillohet sipas ligjit nuk e kuptoj pse duhen bojkotuar", tha Petry.

Për sa i përket djegies së mandateve Petry si deputet në bundestagun gjerman e quan një hap të gabuar të ndërmarrë nga opozita shqiptare dhe sipas tij, kritikat e ngritura nga opozita nuk janë të kuptueshme.

"Gjatë bisedave konstatova vështirësinë e raportit qeveri opozitë. Për mua si deputet i bundestagut gjerman është e vështirë të kuptoj se si mund të merren vendime të tilla si dalja nga parlamenti. Ashtu dhe kritikat e ngritura për mua nuk janë të kuptueshme. Unë nuk e konsideroj si një hap të saktë dhe të duhur vendimin për braktisjen e parlamentit, pasi i shmangemi proçesit demokratike", tha deputeti i Bundestag-ut.

Duke u ndalur tek reformat e ndërmarra nga qeveria shqiptare deputeti gjerman theksoi se është bërë progres jo vetëm në Reformën në Drejtësi, por dhe në vendosjen e shtetit ligjor ndaj dhe do të propozojnë çeljen e negociatave.

"Në Shqipëri janë duke u ndërmarrë përpjekje mjaft të mëdha si reforma në drejtësi dhe ndërtimi i një shteti ligjor. Është mbresëlënëse të shikoj dhe konstatoj sa shumë energji është duke u investuar për të vendosur një sistem të ri drejtësie që është historike. Unë opinionin tim për çeljen e negociatave do ta shoqëroj në mënyrë pozitive", përfundoi  Petry.

Më herët deputeti Petry ka pasur takime me Presidentin e vendit Meta, kryeministrin Rama, anëtarë të shoqërisë civile dhe takimin e fundit e ka rezervuar me kreun e PD, Lulzim Basha.

B.K./Shqiptarja.com

TAG:
• LSI
• PD
• zgjedhjet lokale 2019
• Christian Petry