Olcion Muça, ushtari i cili ditën e djeshme tentoi të grabiste një bankë të nivelit të dytë në qendër të Lushnjës, tashmë i prangosur nga uniformat blu, kishte vetëm katër muaj që banonte në lagjen “Xhavdet Nepravishta”, ndërkohë që origjina e tij është nga qyteti i Beratit.

Ai punonte si ushtar profesionist në repartin e Forcave të Armatosura në Poshnje, është i martuar dhe me dy fëmijë binjake. Përpara oficerëve të policisë ai ka pranuar krimin duke u justifikuar se kishte nevojë për para. I riu ka rrëfyer se kishte aplikuar për një overdraft page, në bankën që tentoi të grabiste, por kërkesa i ishte refuzuar.

Report Tv ka shkuar në banesë ku aktualisht po qëndron bashkëshortja e 25 vjeçarit dhe ka tentuar të komunikojë me të, por kjo e fundit nuk ka pranuar të flasë. Ndërsa komshinjtë ku jeton me qira çifti, shprehen se nuk njohin nga afër autorin e grabitjes, Olcion Muça.

Detaje të tjera për ngjarjen e tentativës së grabitjes së bankës nga ana e Muçës, pritet të zbardhen nga Prokuroria e Lushnjes, pasi ai ka rënë në duart e policisë menjëherë pas ngjarjes.