Vrasja e biznesmenit Hoxha/ Nga thirrjet telefonike tek ekzekutimi në Dajt! Celulari i viktimës u gjet pas lokalizimit me ‘IMSI Catcher’, përfundoi te taksisti që e shiti

Tre thirrje të humbura në celularin e Ruzhdi Hoxhës paraditen e 20 tetorit të bëra nga telefoni i Fredi Rrushit kanë ngritur dyshimet tek hetuesit se ky i fundit është i përfshirë në vrasjen dhe zhdukjen e biznesmenit të inerteve në Kamëz.

Prokuroria e Tiranës ka zbuluar se Fredi Rrushi e ka telefonuar Hoxhën për t’i kërkuar takim, por ky i fundit e ka shmangur. Rrushi ka insistuar sërish dhe ka artitur të flasë me 43-vjeçarin biznesmen përmes telefonit të një miku të përbashkët me të cilin Ruzhdi Hoxha ishte në tavolinë në lokal.

“Përse s’më përgjigjet?”, - mësohet t’i jetë drejtuar Fredi Rrushi, Ruzhdi Hoxhës. Ndërsa ky i fundit i thotë se nuk e ka dëgjuar telefonin, duke i lënë takim në të njëjtin lokal që ndodhej me shokët, në autostradën Tiranë-Durrës.

Pa e ditur se pas kësaj telefonate ekzistonte një plan për ta elkeminuar fizikisht, Ruzhdi Hoxha e priti në takim. Pasi qëndruan disa minuta nën shoqërinë e përbashkët, Rrushi dhe biznesmeni u shkëputën nga grupi për të vazhduar udhëtimin e fundit drejt Malit të Dajtit në Tiranë.

Por pasi Ruzhdi Hoxha u shpall i zhdukur dhe u denoncua në polici nga familjarët, Fredi Rrushi pranoi që kishte qenë ai personi që e shoqëroi për herë të fundit por gënjeu në dëshmi, duke thënë se e çoi në Mëzez për të takuar një vajzë. Thirrjet me numrin e tij në telefonin e biznesmenit e bënë Fredi Rrushin të dyshuarin kryesor, megjithatë më 26 tetor, ai u arerstua jo si vrasës, por sepse kërkohej nga Italia për trafik droge.

Dy ditë më pas, prokuroria gjurmoi nëpërmjet pajisjes “IMSI Catcher” numrin e telefonit të Ruzhdi Hoxhës, i cili u lokalizua në një dyqan celualrësh në një zonë të kryeqytetit. Numri dhe telefoni ishin tek një shitës i cili ka rrëfyer se e bleu për 1000 lekë nga një taksist që e kishte gjetur në rrugë. Telefoni ishte hedhur në të njëjtin intinerar që Rrushi përshkroi pasi zbrit nga Dajti.

Hetuesit kanë rindërtuar intinerarin e lëvizjes dhe dinamikën e krimit, ku konfirmohet edhe me pamje filmike nga disa biznese se Fredi Rrushi ka udhëtuar sëbashku me Ruzhdi Hoxhën drejt Dajtit. Pasi janë përleshur fizikisht, Fredi Rrushi e ka vrarë me dy plumba dhe është kthyer rreth orës 15:00 më 20 tetor.

Mëngjesin e 21 tetorit, kur ora shënonte 05:00 Rrushi rezulton se ka shkuar sërish në Dajt e këtë herë sipas hetuesve për të fshehur trupin e viktimës të cilin e ka mbuluar me dhe, gurë e shkurre në këtë zonë ku u gjet tre ditë më parë.

Ndaj Fredi Rrushi rëndojnë tre akuza, vrasja me paramendim, armëmbajtje pa leje dhe zhdukje kufome. Ndërsa vëllai i tij Pajtim Rrushi është arrestuar për moskallëzim krimi e veprime që pengojnë zbardhjen e të vërtetës dhe të dy të mërkurën do të dalin para gjykatës. Pajtim Rrushi ka deklaruar se nuk mbante mend asgjë, pasi COVID e kishte lënë me pasoja. 

Të dy, Rruzhdi Hoxha dhe Fredi Rrush, janë përfshirë prej kohësh në aktivitetet kriminale, nga mashtimi, vjedhja dhe kultivimi drogës. Por hetuesit, ende nuk kanë një motiv përse është ekzekutuar biznesmeni, ndërsa vrasësi i tij, vijon të mos pranojë krimin, edhe pas një jave në qeli.

Viktima Ruzhdi Hoxha dhe autori Fredi Rushi

 

Rendit zhvillimet sipas orarit:

Të Fundit Të Parat

/K.T./Shqiptarja.com

TAG:
• Tirane
• dajt
• prokuroria e tiranes
• ruzhdi hoxha
• vrasja e ruzhdi hoxhes
• fredi rushi