Një tjetër episod shqetësues ka ndodhur në futbollin e Maqedonisë së Veriut, ku tifozët vendas kanë bërë thirrje të hapura raciste gjatë një ndeshjeje të kategorisë së dytë.

Gjatë sfidës mes Pobedës dhe Shkëndijës së Haraçinës (klub shqiptar në vendin fqinj), e vlefshme për javën e 10-të të kampionatit, tifozët e Pobedës u dëgjuan duke brohoritur thirrjen skandaloze: “Dhoma gazi për shqiptarët”.

Tifozeria e njohur si “Majmunët”, e cila vepron në qytetin e Prilepit, është përsëritur edhe këtë herë me qëndrime të hapura raciste ndaj shqiptarëve. Ky grup tifozësh është i njohur për thirrjet e tilla, që janë dëgjuar edhe në ndeshjet e mëparshme, përfshirë edhe ato të Kombëtares shqiptare në Maqedoninë e Veriut.

Kjo sjellje është dënuar gjerësisht nga komuniteti sportiv dhe shoqëria civile, duke kërkuar ndërhyrje të menjëhershme nga autoritetet dhe institucionet për të parandaluar përsëritjen e rasteve të tilla që cenojnë rëndë vlerat e sportit dhe respektit ndërmjet komuniteteve.