Dhuna në familje, policia heton
8 persona përgjatë 24 orëve

TIRANË - Parandalimi i dhunës në familje vijon të ngelet një nga prioritetet e policisë. Vetëm gjatë 24 orëve të fundit efektivët e policisë kanë evidentuar 8 të tilla, duke marrë masat e nevojshme ndaj personave të denoncuar. 

Policia e Shtetit ka bërë të ditur se, një person është arrestuar, 2 janë në gjendje të lirë, ndërkohë në 5 raste policia ka plotësuar kërkesë-paditë për lëshimin e urdhrave të mbrojtjes.

Në Elbasan është arrestuar një person i akuzuar për dhunë në familje. Sajmir Ajazi,  34 vjeç,  banues në Elbasan, është ndaluar pasi në orën 16:00, në banesë, për motive të dobëta, ka goditur me grusht bashkëshorten e tij 33-vjeçare. 

Në Berat ka nisur procedimi penal në gjendje të lirë për 32-vjeçarin Qamil A., pasi nuk ka zbatuar vendimin për urdhrin e mbrojtjes së menjëhershëm të dhënë për bashkëshorten e tij 29- vjeçare.   
Në Fier, ka filluar procedimi penal në gjendje të lirë për 41-vjeçarin Eduart B., banues në fshatin Vanaj, pasi dyshohet se në banesë, ka ushtruar dhunë fizike e psikologjike ndaj bashkëshortes së tij 41-vjeçare.  
Nga Policia e Tiranës, në 3 raste është plotësuar kërkesë-padia për lëshimin e urdhrit të mbrojtjes. Nga efektuivët e policisë është lëshuar urdhri menjëhershëm i mbrojtjes për 20-vjeçaren me inicialet A. M., pasi babai i saj, Ekrem M., 51 vjeç, akuzohet se ka ushtruar dhunë fizike dhe psikologjike ndaj saj.

Po ashtu është plotësuar kërkesë-padia për lëshimin e urdhrit të menjëhershëm të mbrojtjes për 42-vjeçaren me inicalet A. B., nga Tirana, pasi bashkëshorti Shpëtim M., 50 vjeç, ka ushtruar dhunë fizike e psikologjike ndaj saj.

Është plotësuar kërkesë-padia për lëshimin e urdhrit të menjëhershëm të mbrojtjes për 55-vjeçaren me inicialet R. S., banuese në Bathore, pasi dhëndri i saj  Ilir G., 40 vjeç, akuzohet se ka ushtruar dhunë fizike e psikologjike ndaj saj.  

Nga Policia e Durrësit, u plotësua kërkesë-padia për lëshimin e urdhrit të menjëhershëm të mbrojtjes për 42-vjeçaren F.V., banuese në Durrës, pasi bashkëshorti Ardian V., 44 vjeç, akuzohet se ka ushtruar dhunë fizike e psikologjike ndaj saj.  

Ndërkohë në Shijak është plotësuar kërkesë-padia për lëshimin e urdhrit të menjëhershëm të mbrojtjes për 58-vjeçarin Enver S., banues në fshatin Shkallë, pasi djali i tij, Sajmir S., 29 vjeç, akuzohet se ka ushtruar dhunë fizike e psikologjike ndaj tij.  
 
Redaksia online
(ac/shqiptarja.com)