33 vite burg është masa e dënimit ndaj dy autorëve të dhunimit dhe kërcënimit të një çifti në një pyll në Seman të Fierit.

Sipas vendimit të marrë, 33 vite burg është masa e dënimit në total për dy autorët Endri Goga 22-vjeç dhe Shaban Skeja 20-vjeç, ku Goga ëhstë dënuar me 24 vite dhe Skeja me 9 vite burgim.

Ngjarja e rëndë ndodhi më 20 tetor të vitit 2014, teksa çifti kishte dalë për shëtitje dhe kur dy të rinjtë i dhunuan dhe kërcënuan me armë, ndërkohë që vajzën e përdhunuan në mes të pyllit.

Pas akteve të dhunës, dy autorët janë larguar nga vendi i ngjarjes, ndërkohë që çifti ka bërë kallëzim në polici.
 
Ja vendimi i Gjykatës
Gjykata e Fierit ka dënuar me një dënim në total 33 vjet burg dy persona, të akuzuar nga Prokuroria se kanë vjedhur dhe dhunuar nën kërcënimin e armëve një çift, si edhe kanë ushtruar dhunë seksuale mbi anëtaren femër të çiftit, ngjarje e ndodhur në dt. 20.10.2014 në pyllin e Semanit. Vendimi i gjykatës është dhënë pak ditë më parë.
I pandehuri Endri Goga është dënuar me 24 vjet burgim, ndërsa bashkëpunëtori i tij, Shaban Skeja, me 9 vite burgim. Procesi ndaj tyre është zhvilluar me gjykim të shkurtuar dhe për këtë arsye, ata përfitojnë uljen me 1/3 e dënimit.
Prokuroria e Fierit ka zhvilluar hetimet, nga të cilat kanë rezultuar se:
Në datë 20.10.2014, çifti V.M dhe E.A. kishin dalë për shëtitje në zonën e plazhit të Semanit. Në një moment intim ndërmjet tyre, pranë makinës ku gjendej çifti janë afruar dy persona të armatosur, të cilët kanë ushtruar dhunë, me qëllim marrjen e portofolëve dhe sendeve me vlerë që kishin në posedim.
Në dinamikë të ngjarjes, i pandehuri Skeja ka nxjerrë nga makina shtetasin V.M., duke e shtrirë në tokë nën kërcënimin e armës, ndërkohë që i pandehuri Goga ka ushtruar kontroll për sende me vlerë në automjetin e çiftit, ku gjendej edhe e dëmtuara E.A.
Gjatë kontrollit të mjetit, i pandehuri Goga ka kërcënuar me armë të dëmtuarën, duke ushtruar ndaj saj edhe dhunë seksuale. Pas akteve të dhunës, dy të pandehurit janë larguar nga vendi i ngjarjes, ndërkohë që të dëmtuarit kanë bërë kallëzim në Polici.
Në vijim të hetimeve të zhvilluara nga Prokuroria e Fierit, ka rezultuar se autorët e veprave penale janë të pandehurit Endri Goga dhe Shaban Skeja, të cilët u arrestuan pak kohë pas ngjarjes.
Gjykata e Fierit i dënoi të pandehurit për veprat penale; (Endri Goga) “Marrëdhenie seksuale  ose homoseksuale me kërcënim me përdorimin e armës”; “Vjedhja me dhunë”, në bashkëpunim; “Prodhimi  dhe mbajtja pa  leje  e armëve luftarake”
(Shaban Skeja) për veprat penale “Vjedhja me dhunë”, në bashkëpunim;  “Prodhimi dhe mbajtja pa leje e armëve luftarake”.

Redaksia Online
(F.T/shqiptarja.com)