DASH: Dialogu Kosovë-Serbi e vetmja rrugë për normalizimin e marrëdhënieve! Kryenegociatorët sot takime në Bruksel

Kryenegociatorët e Kosovës dhe të Serbisë, Besnik Bislimi dhe Petar Petkoviç, gjenden sot në Bruksel për një rund të ri bisedimesh në kuadër të dialogut për normalizimin e marrëdhënieve. Ende nuk dihet nëse do zhvillojnë takim të përbashkët, apo vetëm me zyrtarët e BE-së.

Për herë të fundit, ata janë takuar në fillim të korrikut, por pa ndonjë rezultat. Para takimit ndërmjetësi i Bashkimit Evropian, Miroslav Lajçak vizitoi Prishtinën e Beogradin.

Ndërsa sot pritet të mbahet takimi, Departamenti amerikan i Shtetit përsëriti se e ardhmja e Kosovës dhe Serbisë është në institucionet e Bashkimit Evropian dhe se dialogu mes tyre, i ndërmjetësuar nga BE-ja, është “e vetmja rrugë për të ecur përpara”.

Zëdhënësi i Departamentit të Shtetit tha për Radio Europa e Lirë se SHBA-ja “vazhdon të mbështesë fuqishëm dialogun e lehtësuar nga BE-ja ndërmjet Kosovës dhe Serbisë, si rrugë për të arritur një marrëdhënie paqësore dhe produktive ndërmjet dy vendeve”.

Zëdhënësi i Departamentit amerikan të Shtetit u bëri po ashtu thirrje Kosovës dhe Serbisë që “të përmbahen nga retorika e mëtejshme përshkallëzuese, veprimet e pakoordinuara apo aktet legjislative që bien ndesh me normalizimin e marrëdhënieve të tyre ose që rrezikojnë stabilitetin dhe sigurinë”.

Këtij takimi presidenti serb Aleksandër Vuçiç i parapriu me 7 kërkesa të cilat i bëri publike javën e kaluar: Shpallja e zgjedhjeve të reja lokale në veri të Kosovës, kthimi i serbëve në Policinë e Kosovës dhe funksionet gjyqësore, tërheqja e njësive speciale të Policisë së Kosovës nga veriu, formimin e Asociacionit të komunave me shumicë serbe, zbatimin e garancive të BE dhe SHBA për lirimin e të burgosurve politikë serb dhe kthimin e pagesave me valutën serbe dinar.

Kryeministri i Kosovës, Albin Kurti, nuk i komentoi kërkesat e Vuçiqit, por kryetari i Kuvendit të Kosovës, Glauk Konjufca tha se ato janë antikushtetuese.

Kosova dhe Serbia janë në negociata për normalizimin e marrëdhënieve qysh në vitin 2011. Përveçse në nivel kryenegociatorësh, bisedimet zhvillohen edhe në nivel politik.

Megjithatë, kryeministri i Kosovës, Albin Kurti, dhe presidenti i Serbisë, Aleksandër Vuçiç, nuk janë takuar qysh në shtator të vitit të kaluar dhe të dy kanë akuzuar njëri-tjetrin për qasje jokonstruktive.

Xh.K/SI.E./Shqiptarja.com

TAG:
• Petar Petkoviç
• Bruksel
• kosove
• serbi
• Mirosllav Lajçak
• besnik blismi