Dibra, Mati dhe Klosi prezantojnë
trashëgiminë kulturore në Tiranë
 

Një panair me vlerat e trashëgimisë kulturore dhe etnografike të zonës së Dibrës, të Matit e Klosit është çelur këtë të shtunë në Tiranë.

Në sheshin “Avni Rustemi”, pranë tregut, artizanët e këtyre trevave kanë sjellë punimet e tyre, si dhe prodhimet bujqësore e blegtorale, duke shpalosur artin e shijen tradicionale të trashëguar në shekuj.

Dhjetëra këngë e valle folklorike janë shpalosur nga të rinjtë e zonave më të thella të këtyre trevave.
 
Grupi me vajza dhe djem të rinj kanë ardhur nga Guri i Bardhë, ish qytet i vjetër i Arbërit, i njohur nga të huajt si Petralaba. Këtu ka qenë rezidenca e Skënderbeut dhe Kalaja e tij.

Kjo zonë është e njohur në histori për traditat e saj të veçanta dhe të rinjtë ndihen krenar që trashëgojnë e ruajnë traditat më të lashta.
 
"Zona jonë ka traditat më të mira.Ne jemi krenar për këto tradita dhe i përcjellim edhe në brezin e ri", shprehet një nga nga vajzat e reja.

"Janë tradita shumë të mira", shprehet një tjetër vajzë.

Ndërsa një banor i zonës thotë se këto kostume gjenden vetëm në tre fshatrat e trevës së Matit.
 
Këngët, vallet dhe kostumet shumëngjyrëshe me veçoritë specifike të çdo zone, që do të prezantohen gjatë dy ditëve të këtij panairi, vijnë në Tiranë si një dëshmi e pasurisë shpirtërore të këtyre trevave.
 
Redaksia Online
e.m/Shqiptarja.com