Dimri polar/ Në Kapshticë u krijua situatë kaotike, autobusët mbetën mbi 3 orë pritje! Udhëtarët: Shteti ta zgjidhte, qëndruam mes borës, me fëmijë, pleq e gra shtatzëna (VIDEO)

Kapshticë- Pas ndërprerjes së qarkullimit të kamionëve dhe autobusëve për kalim në Doganën e Kapshticës nga pala greke, numri i mjeteve, kamionave dhe autobusëve të cilët prisnin pranë kësaj dogane për të kaluar drejt Greqisë, ishte tepër i lartë deri pasditen e sotme.

Udhëtarët dhe drejtuesit e automjeteve shpreheshin të shqetësuar për këtë situatë dhe thanë se po prisin aty për mbi 3 orë për të kaluar doganën, ndërsa nuk kishin një përgjigje apo interesim nga pala shqiptare, se kur do të hapej kufiri për ta (deri në orën 14:30, 13 Janar).

Gjithashtu nuk kishin asnjë përgjigje dhe apeluan që autoritetet shtetërore të angazhohen, pasi pala greke mjetet e saj (përveç kamionëve) i lejonte të qarkullonin për hyrje drejt vendit tonë, por jo në territorin e saj nga Shqipëria.

Rreth orës 15:00 Policia Kufitare Greke ka njoftuar edhe hapjen e doganës për kamionët dhe autobusët, duke i dhënë fund pritjes së qytetarëve dhe qëndrimit për orë të tëra në acarin dimëror.

“Si nuk është situatë e vështirë, është situatë e papranueshme. Shteti shqiptar duhet të bëjë një reagim, mirë kamionat se është çështje sigurie, por autobusët nuk i lejojnë edhe pse të pajisur. Ka fëmijë, pleq, gra shtatzëna, s’kanë ushqime, ku të rrinë, tualete s’ka, ku do rrinë, kanë probleme. S’ka sqarime nga shteti shqiptar, dikush duhet të dalë të japë shpjegime, çfarë të bëjmë, të rrimë të presim, sa do presim? Nga Greqia vijnë vetura dhe autobusë, kurse këtej nuk lejohen. Janë 6 autobusë me nga 50 vetë që presin, gati 300 vetë. Dikush të angazhohet. Në Greqi janë rrugët e hapura”, thotë një prej qytetarëve, kur situata nuk kishte marrë ende zgjidhje.

Ata shprehen se ishin të painformuar paraprakisht për këtë mbyllje dhe se situata i gjeti të papërgatitur. Teksa kanë edhe probleme me letrat në vendin fqinj nëse nuk kalojnë, ndaj kërkojnë zgjidhje të situatës.

“Nuk e dimë se kur do hapet nga pala greke. Ne premë biletat dhe u nisëm, erdhëm këtu dhe na thanë po nuk e dinim. Situata shumë e vështirë, ja shiheni vetë mes të ftohtit. Duhet të ikim patjetër, më digjen dhe letrat po s’kalova sot. Agjencitë të na japin një zgjidhje, o letrat, o lekët e të ikim me taksi. Duam një zgjidhje”, thotë një tjetër.

Por teksa qëndrojnë prej 3 orësh mes të ftohtit dhe borës që nuk ka të ndalur dhe bie me intensitet, ata shprehen se ka edhe probleme pasi shumë pasagjerë janë gra, fëmijë dhe të moshuar, teksa presin për tre orë.

“Kemi 3 orë që presim. Njerëz, kalamaj, gra, ftohtë është. Nuk e dimë e sa orë do presim, nuk jep kush zgjidhje. Duhet të kalojmë patjetër se kemi problem me dokumentet”, apelon një tjetër qytetar.

Dogana greke njoftoi mbylljen e kufirit që nga dita e djeshme në orën 17:00 për autobusët dhe kamionët, duke e rihapur pasditen e sotme.

Rendit zhvillimet sipas orarit:

Të Fundit Të Parat

A.Q/Shqiptarja.com

TAG:
• shqiperi
• greqi
• autobuset
• Korce
• kapshtice
• moti i keq