SHËNGJERGJ- Në kuadër të Ditës Ndërkombëtare të Mësuesit, presidenti Ilir Meta ka vlerësuar pas vdekjes mësuesin Ymer Distafa, me Titullin “Naim Frashëri”.
Ky titull i është dhënë me motivacionin: Në vlerësim të përkushtimit të jashtëzakonshëm për zhdukjen e analfabetizmit dhe konsolidimin e arsimit shqiptar, pas çlirimit të vendit. Në nderim të punës së palodhur në Shëngjergj për përçimin e diturisë dhe edukimin shoqëror e kulturor të brezave të rinj, si dhe për kontributin 40-vjeçar të dhënë si mësues fisnik në fushën e arsimit në këtë zonë.
“Jam i lumtur që ndodhem, në Shëngjergjin e mrekullueshëm për të vlerësuar një bir të shquar të kësaj zone, mësuesin e nderuar Ymer Distafa. Edhe pse për disa vite, iu ngarkuan detyra të rëndësishme drejtuese në fushën e arsimit, ai kërkoi të kthehej të jepte mësim në zonën që e donte aq shumë, në Shëngjergj. Kontributi i tij prej 40 vitesh, për edukimin e brezave të rinj në Shëngjergj ka qenë shumë i vyer dhe ka lënë gjurmë të pashlyeshme. Në vitet e para pas Çlirimit, ai, punoi me përkushtim për zhdukjen e analfabetizmit dhe konsolidimin e arsimit shqiptar dhe më vonë, me përkushtim e energji, formonte nxënësit e tij dhe përçonte diturinë, duke e ngritur arsimin e kësaj zone në nivele të larta. Ymer Distafa iu dedikua edukimit të brezit të ri, me njohjen e historisë së vendit dhe popullit tonë dhe sidomos, për njohjen e ngjarjeve të luftës antifashiste. Është një titull i veçantë, sepse i jepet ‘Naim Frashëri’, që mbart emrin e poetit, shkrimtarit, një prej përfaqësuesve më të ndritur të Rilindjes tonë Kombëtare, bilbilit të gjuhës shqipe, që aq bukur i këndoi mallit e dashurisë për atdheun, krenarisë kombëtare dhe të kaluarës së lavdishme të kombit tonë”, tha Meta.