Të martën paradite, pasi kodra e mbetjeve në Elbasan ishte gdhirë e përpirë nga flakët, në qytet mbërriti një grup ekspertësh për të matur ndotjen e shkaktuar në mjedis nga djegia e mbeturinave.

Një grup i specializuar nga Co-PLAN dhe Milieukontakt monitoruan situatën në terren dhe vlerësuan ndikimet e zjarrit në cilësinë e ajrit.

“Matjet në terren treguan përqendrime të larta të ndotësve të ajrit, që paraqesin një rrezik të drejtpërdrejtë për shëndetin publik dhe mjedisin përreth”-thotë organizata e mbështetur me financim dhe ekspertizë ndërkombëtare.

Përqendrimet e ndotësve të ajrit të regjistruara vetëm pak orë pas shpërthimit të zjarrit rezultuan mbi normat e pranuara nga BE dhe me pasoja serioze për qytetarët.

Siç thonë ekspertët, në mjedis, një ditë pas zjarrit niveli i dioksidit të karbonit (CO₂) ishte rreth 521 – 794 ppm.

“Ky nivel është mbi normën prej rreth 350 ppm dhe tregon djegie të pakontrolluara të materialeve organike, që ndikojnë negativisht në shëndetin e njeriut dhe mjedisin përreth”,-thotë raporti. Ky nivel i shtuar i dioksidit të karbonit, u shkakton njerëzve lodhje, marramendje, vështirësi në frymëmarrje.

Në ajër u gjet gjithashtu një nivel i lartë metani, 3-4 fish më lart se normalja, që sipas ekspertëve përbën rrezik potencial për shpërthime dhe ul nivelin e oksigjenit në nevojshëm për frymëmarrje.

Specialistët e mjedisit të Co Plan matën dhe nivelin e dioksidit të azotit (NO₂) i cili rezultoi deri në 331 µg/m³. Ky përqendrim dëmton mushkëritë, shkakton kollë, ndikon te astmatikët.

“Përqendrimi i NO₂ tejkalon ndjeshëm kufirin e lejuar nga Bashkimi Europian, të cilët rekomandojnë që ekspozimi afatshkurtër (1 orë) të mos kalojë 200 µg/m³. Vlera e matur prej 331 µg/m³ tregon një rrezik serioz për sistemin respirator të banorëve përreth landfillit”-thuhet në raport.

Raporti dokumenton edhe praninë e një elementi, të njohur si VOC, lëndë organike që janë pezull në ajër, me vlerë deri në 6,800 µg/m³

“VOC tejkalojnë ndjeshëm kufijtë e rekomanduar nga standardet e BE-së  dhe janë shumë të rrezikshëm për shëndetin, me efekte toksike dhe potencial kancerogjen. Ato gjithashtu ndikojnë në formimin e ozonit në nivelin e tokës, duke përkeqësuar cilësinë e ajrit”-thonë ekspertët.

Njerëzit që thithin të tillë gaz, kanë irritime, dhimbje koke, rrezik kancerogjen.

Co-PLAN, një Institut për Zhvillimin e Mjedisit që bëri këto matje, kryen vazhdimisht monitorime të ajrit në vend, me mbështetje financiare të huaj, kryesisht suedeze.

1. Dioksidi i karbonit CO₂
Elbasan: 521-794 ppm
Normalja: 350 ppp
Pasojat: Lodhje, marramendje, vështirësi në frymëmarrje.
2. Metani CH₄ (
Elbasan: 5-8 ppm
Normalja: 1.8
Pasojat: Rrezik shpërthimi, ulje e oksigjenit.
3. Dioksidi i Azotit NO₂
Elbasan: 331 µg/m³
Normalja: 200 µg/m³
Pasojat: Dëmton mushkëritë, shkakton kollë, ndikon te astmatikët.
4. Mbetjet organike pezull VOCs
Elbasan: 6,800 µg/m³
Normalja: 1000 µg/m³
Pasojat: Toksike, irritime, dhimbje koke, rrezik kancerogjen.
S.B/K.M/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 3 Dhjetor, 08:56

    Çfarë mendoni për lëvizjen e Salianjit brenda PD?

Lajme të tjera