Do kalonte 18 emigrantë në Kosovë, shpallet në kërkim 20-vjeçari në Kukës! Braktisi mjetin dhe i shpëtoi policisë

Një 20-vjeçar, i identifikuar si Flori Lisaj është shpallur në kërkim nga policia e Kukësit pasi do kalonte 18 emigrantë në Kosovë dhe më pas drejt vendeve të BE. Ai akuzohet për veprat penale "Ndihma për kalim të paligjshëm të kufijve" dhe "Mosbindja ndaj urdhërit të punonjësit të policisë së rendit publik".

Në orët e para të mëngjesit të sotëm, shërbimet policore të Njësisë për Sigurinë e autostradës “Milot-Morinë”, në aksin rrugor “Tuneli-Morinë”, i kanë bërë shenjë ndalimi automjetit tip fugon, të marrë me qira nga i riu me qëllim kryerjen e kontrollit.

Lisaj nuk iu bind urdhrit, por u largua me shpejtësi, braktisi mjetin dhe duke përfituar nga kushtet e errësirës, ka mundur të largohet. 

Gjatë kontrollit në këtë automjet, shërbimet e Policisë kanë konstatuar 18 emigrantë nga Siria, të cilët po i transportonte kundrejt pagesës, në drejtim të Morinës, me qëllim kalimin e paligjshëm të kufirit.

Vijon puna intensive për kapjen e 20-vjeçarit dhe vënien e tij përpara përgjegjësisë penale.

Materialet procedurale i kaluan Prokurorisë pranë Gjykatës së Rrethit Gjyqësor Kukës, për veprime të mëtejshme.

A.M./Shqiptarja.com

TAG:
• flori lisaj
• Kukes