Dollapi: S' jap dorëheqjen
kam drejtuar mirë CEZ-in

 TIRANE-   Administratori shtetëror i CEZ, Sahit Dollapi deklaron se nuk do të japë dorëheqjen dhe nuk pret të shkarkohet pasi ka punuar mirë.

Përgjigjja e Dollapit vjen një ditë pasi TV A1 Report e Shqiptarja. com publikoi emrin e Arben Seferit si personi i cili pritet të bëhet zyrtar nga qeveria "Rama", për t'u ulur në vend të Dollapit.

 I pranishëm në inspektimin e punimeve për nënstacionin e Farkës, Dollapi tha se do të jetë i angazhuar të punojë me të njëjtin standard, pavarësisht se cfarë qeverie do të jetë në pushtet.
 
“Unë vazhdoj të krye detyrën e administratorit të CEZ deri në momentin kur bordi apo struktura që më ka emëruar të më njoftojë për një vendim të dytë.  Nuk kam asnjë njoftim për shkarkimin tim.” 

I pyetur nëse do i paraprijë shkarkimit të tij me dorëheqje, Dollapi u përgjigj:

“As nuk do i paraprij me dorëheqje dhe as nuk do të pres shkarkimin nga ERE pasi ERE e çdo institucion tjetër duhet të masë punën me rezultatet. Unë do të punoj me të njëjtin standard si në qeverinë e mëparshme. Unë do të vazhdoj punën me strukturën time  dhe shpresoj se 90 % do të jenë aktërktimet dhe niveli i humbjeve do të bjerë 37 %.  Ky është objektivi im”- tha Dollapi.
 
Ndërtimin e nënstacionit të Farkës Dollapi e vlerësoi si një nga investimet më të rëndësishme dhe strategjike në këtë “situatë emergjente” siç tha Dollapi.  
 
“Ky investim nuk është kryer me të ardhurat e kompanisë që në 2004. Ky investim zgjidh problemet e zonës së Farkës, Lundrës, Baldukshut dhe përmirëson furnizimin me energji të Tiranës. “

Ndërtimi i nënstacionit të Farkës ka nisur dy muaj më parë dhe pritet të përfundojë brenda këtij muaji.
 
Dollapi u pyet dhe ndërprerjet e energjisë gjatë ditës së djeshme në disa zona të Tiranës. Sipas tij  ka pasur avari të vogla të cilat janë riparuar dhe brenda 1 orë e gjysmë është rikthyer energjia.

Emri që flitet për tu ulur në postin e Sahit Dollapit Arben Seferi, në vitin 2009 ka qenë drejtues i Punëve Publike në bashkinë e Tiranës, ndërsa në vitin 2011, ka qenë Drejtor i Ndërmarrjes nr.1 të Tiranës.

Redaksia online
(sg/shqiptarja.com)

TAG:
• sahit dollapi