Dommaraju Gukesh: 18-vjeçari kampioni më i ri Botëror në Shah! Thyen Rekordin e Kasparovit

Dommaraju Gukesh, vetëm 18 vjeç, ka hyrë në histori si kampioni më i ri botëror në shah, duke thyer rekordin legjendar të Garry Kasparovit. Në një përballje dramatike trejavore në Singapor, ai triumfoi kundër kampionit në fuqi, Ding Liren, në finalen e Kampionatit Botëror të Shahut.

Fitorja e tij historike erdhi pas një ndeshjeje të ngushtë prej 14 lojërash, ku Gukesh shfrytëzoi një gabim fatal të Ding në lojën vendimtare. Në një situatë që dukej e barabartë, Ding bëri një lëvizje të gabuar, duke i hapur rrugën Gukesh drejt fitores. Ky gabim është cilësuar si një nga më të mëdhenjtë në historinë 138-vjeçare të kampionatit botëror. Pas 58 lëvizjesh, Ding dorëzoi lojën, duke vulosur rezultatin 7½-6½ dhe duke shmangur nevojën për lojëra shtesë.

Ky triumf i dha Gukesh jo vetëm titullin më prestigjioz në shah, por edhe një shpërblim prej $1.35 milionë nga fondi total prej $2.5 milionësh. Duke thyer rekordin e Kasparovit, i cili u shpall kampion botëror në moshën 22-vjeçare, Gukesh ka dëshmuar talentin e tij të jashtëzakonshëm dhe përkushtimin e palëkundur.

Në lojën finale, Ding, duke luajtur me gurët e bardhë, filloi me një avantazh të lehtë, por Gukesh arriti të stabilizonte pozicionin dhe të mbante ndeshjen të ekuilibruar. Loja dukej e destinuar për barazim deri në lëvizjen fatale të Ding, një moment që Gukesh e përshkroi si "më të mirin e jetës së tij."

Emocionet ishin të forta në përfundim të ndeshjes. Ding uli kokën në duar, ndërsa Gukesh mezi e përmbajti gëzimin e tij. Kjo fitore është një moment historik jo vetëm për të, por edhe për shahun indian, duke vendosur një standard të ri për brezin e ri të shahistëve.

G.K/Shqiptarja.com

TAG:
• loje shahu
• garry kasparov
• Dommaraju Gukesh