Drejtësia, ekspertët: Presidenti
jokonsensual ka sjellë probleme

Reforma në drejtësi ka mbledhur sërish bashkë këtë të hënë ekspertët për të nxjerrë elementët që e bëjnë sistemin të çalojë. Një nga problematikat e ngritura ishte ndryshimi që kushtetuta e Shqipërisë pësoi në vitin 2008, ku një ndër nenet e saj parashikon zgjedhjen e një presidenti jo konsensual. Sipas ekspertit të së drejtës Sokol Sadushi këto ndryshime në mënyrën e zgjedhjes së kreut të shtetit sollën krijimin e një marrëdhënie jo bashkëpunuese mes institucioneve.  

Situatën mes presidentit dhe institucioneve të tjera e reflekton më së miri edhe zgjedhja e anëtarëve në Gjykatën e Lartë kur dihet që në këtë të fundit vendet janë ende vakante për shkak të mos gjetjes së një gjuhe të përbashkët mes presidentit dhe Kuvendit. Sipas Sadushi , kjo vjen për shkak se shumica parlamentare nuk ka besueshmërinë e mjaftueshme ndaj presidentit. 

Një tjetër aspekt që çalon në librin themeltar të shtetit është se mungojnë kriteret e qarta që duhet të plotësojnë kandidatët për të qenë anëtarë të Gjykatës Kushtetuese, ndërsa për Gjykatën e Lartë s’ka asnjë kriter. Po ashtu shumica minimale prej 36 deputetësh për të miratuar kandidatët nuk ofron garancinë e mjaftueshme në drejtim të respektimit të paanshmërisë e cilësisë në përbërje të këtyre gjykatave.

Redaksia online
(f.m/shqiptarja.com)