“Isoperla vjosae” quhet insekti më i ri i zbuluar në hidrocentralin e Poçemit në Lumin Vjosa, ndërsa bashkë me të u zbulua edhe një lloj i ri peshku i cili akoma nuk është pagëzuar me një emër nga shkencëtari që e ka zbuluar.

Këto dy gjallesa të reja u zbuluan nga një studim në hidrocentral i realizuar nga rreth 30 shkencëtarë nga 4 vende të ndryshme të botës.

Shkencëtarët zbuluan gjetjet e tyre ditën e sotme në Tiranë, ku në vetëm një javë janë gjetur 300 lloje gjallesash.

Sipas shkencëtarëve lumi i Vjosës është me shumë rëndësi për sa i përket biodiversitetit, ndërsa vënë theksin tek rreziku i zhdukjes së shumë prej kafshëve dhe bimëve që ndodhen në zonë, në rast se do të ndërtohen hidrocentralet e planifikuara.

Sipas Prof. Fritz Schiemer nga Universiteti i Vjenës dhe koordinator i studimeve në Vjosë, vlerësimi i parë mund të shikohet vetëm si fillimi i një studimi më të thelluar. 

“Është e pabesueshme çfarë kemi zbuluar për vetëm një javë. Rezultatet tona tregojnë se një studim i vazhdueshëm i biodiversitetit dhe i transportit të sedimenteve është absolutisht i domosdoshëm”, tha Prof. Schiemer.

Vjosa është lumi i fundit i egër në Evropë i cili rrjedh i pandërprerë, ndërsa është planifikuar  edhe ndërtimi i dy hidrocentraleve të mëdha, Poçem dhe Kalivaç, në pjesët më të vlefshme të lumit.
peshku pocem
  (Peshku i ri i zbuluar, për të cilin nuk është vendosur ende një emër)

lloj i ri i specieve
  (“Isoperla vjosae”, insekti i ri i zbuluar nga shkencëtarët)

lloj i ri i specieve
  (Lumi Vjosa, i fundit natyror në Evropë sipas shkencëtarëve. )


Redaksia Online
J.Sh Shqiptarja.com