Dy ish-kryebashkiakë të Lezhës, Tushaj e Frroku i 'dorëzohen' SPAK-ut për hetime të mëtejshme

Dy ish-kryebashkiakë të qytetit të Lezhës, Viktor Tushaj i Lëvizjes Socialiste për Integrim dhe Fran Frrokaj, i Partisë Demokratike, po hetohen nga prokuroria e Posaçme në Tiranë, për akuzën e “Shpërdorimit të detyrës” dhe “Falsifikimit të dokumenteve”. Burime pranë kësaj prokurorie thanë se prej një muaji, kanë nisur veprimet hetimore ndaj dy ish-zyrtarëve, pasi janë njohur me një material të mbërritur nga prokuroria e Lezhës, e cila ka shpallur moskopetencën dhe çështjen hetimore ndaj dy ish-kryebashkiakëve ja ka kaluar për hetim të mëtejshëm SPAK.

“Shqiptarja.com”, mëson se ish-drejtuesi i bashkisë Lezhë Viktor Tushaj po hetohet për dhënien e një leje ndërtimi në një territor të mbrojtur me ligj dhe që është pjesë e zonës muzeale në qytetin e Lezhës. “Kjo leje ndërtimi për ngritjen e një objekti në qytetin e Lezhës, është miratuar shumë pranë zonës muzeale të varrit të Skëndërbeut”-thonë burimet e prokurorisë.Deri në këtë fazë nga ana e SPAK, nuk ka asnjë akuzë të ngritur ndaj Viktor Tushaj, por hetimet për këtë rast vazhdojnë.

Ndërkohë në hetim është dhe ish-zyrtari i Partisë Demokratike Fran Frrokaj, i cili po hetohet për “Shpërdorim detyre” dhe “Falsifikim dokumentesh”, lidhur me tjetërsimin e sipërfaqeve tokësore në zonën e bregdetit të Lezhës, kryesisht në “Kune” dhe “Rrana e Hedhun”. Për të njëjtën situatë, Fran Frrokaj është marrë i pandehur nga prokuroria e Lezhës dhe vijon të jetë në proces gjyqësor së bashku me disa zyrtarë të tjerë, ku pritet që ditën e hënë prokuroria e Lezhës të lexojë në gjykatë, pretencën ndaj këtyre të pandehurve.

G.M./r.k./Shqiptarja.com

TAG:
• Viktor Tushaj
• spak
• fran frrokaj