E mbani mend 500-lekëshin e viteve ’90? Edlira Athanas, vajza e tenorit të madh Xhoni Athanas dhe balerinës Sekine Sharofi, tregon si u përzgjodh si imazh

E ftuar sot në emisionin e mëngjesit “Rreze Dielli” në Report Tv me moderatore Androniki Kolka, ishte Edlira Athanas Joseph, ish-balerina dhe aktorja e njohur që kishte mbi 30 vite që nuk vinte në Shqipëri.

”Kisha shumë nostagji për vendin tim, pasi kisha shumë vite pa shkelur në tokën shqiptare” tha e emocionuar Edlira në fillim të bisedës.

Gjatë intervistës, ajo rrëfeu dhe një sekret që shumë pak njerëz e dinë… Ajo ka qenë imazhi i 500-lekëshit, në prerjen e vitit 1993. ”Në vitin 1989, kur isha në Festivalin e Gjirokastrës, gjatë kthimit për në Tiranë, më kërkuan për të bërë disa foto në TOB, të cilat do të përdoreshin për kartëmonedhën 500-lekëshe. Më pas, valuta doli në vitin 1993 dhe unë e pashë veten të vendosur në lek, por nuk isha shumë e ndërgjegjshme për rëndësinë në atë kohë” tha Edlira gjatë bisedës në studio, duke shtuar se ishte porositur që të mbahej sekret shtetëror derisa të bëhej publikimi zyrtar i lekut.

Edlira Athanas është vajza e dy artistëve të mëdhenj, tenorit Xhoni Athanas dhe prima balerinës Sekine Sharofi. I ati, Xhoni Athanas ka interpretuar Skëndërbeun në Teatrin e Operas dhe Baletit dhe ka qenë roli më i arrirë i kësaj figure historike, ndërsa e ëma, një figurë ikonë e baletit shqiptar. Kur ishte e vogël, Edlira Athanas u bë e njohur me këngën “Macja le të lahet”, një këngë e njohur fëmijësh, e cila edhe pse e kënduar dekada më parë vazhdon të dëgjohet e këndohet ende edhe nga fëmijët e gjeneratës së sotme. Gjatë karrierës, Edlira vazhdoi rrugën e nënës së saj duke mos vazhduar me muzikën, por me baletin si dhe me aktrimin. Ndër filmat që Edlira ka interpretuar përpara se të ikte nga Shqipëria janë: “Tre ditë nga një jetë” ,“Balada e Kurbinit” ,“Kur ndahesh nga shokët” dhe “Mundi për tek skena”.

Aktualisht Edlira jeton në Boston të Shteteve të Bashkuara të Amerikës, në profesion është psikoanaliste si dhe Presidente e Shoqatës “Bijat e Shëngjergjit” në Kishën më të vjetër të shqiptarëve në Boston, e krijuar nga Fan Noli në  fillim të shekullit të 20.

MC/Shqiptarja.com

TAG:
• rreze dielli
• intervista
• Edlira Athanas