Bujë para Botërorit ka bërë arbitri somalez Omar Artan, i cili do të përfaqësonte për herë të parë vendin e tij në kampionatin botëror. Pas 9 orësh në pyetje autoritet amerikanë vendosën ta kthenin mbrapsht për në Stamboll, duke i prerë ëndrrën e madhe arbitrit.

Madje për këtë pjesmarrje të tij në Somali ishte organizuar një festë ku shteti i bëri të gjithë nderimet. Pas mohimit të kalimit arbitri ishte tejet i zhgënjyer, ndërsa tha se ‘u dogj për shkak të politikave që Amerika ka ndaj vendit të tij’.

Të mërkurën në mëngjes ai u kthye nga Stambolli në Somali. "Ju premtoj, me vullnetin e Zotit, se do të marr pjesë në edicionin e ardhshëm (të Kupës së Botës)", tha Artan në Aeroportin Ndërkombëtar Aden Adde, ku qindra mbështetës u shfaqën duke valëvitur flamurin somalez .

"Dua që publiku somalez të gjejë ngushëllim dhe të ruajë qetësinë." Gjyqtari u shoqërua nga oficerët e policisë në terminalin e aeroportit, ku u prit nga Ministri somalez i Rinisë dhe Sporteve, zyrtarë nga Federata e Futbollit të Somalisë dhe personalitete të tjera. "Është detyrë e të gjithëve ne të mbrojmë emrin e Somalisë ", shtoi Artan. "Somalia na përket neve, pavarësisht nëse është në një situatë të vështirë apo jo. Ai flamur dhe ajo pasaportë na përkasin neve."