Mesazhe për shpresë, përgjegjësi dhe angazhim për vendin. Në vigjilje të Pashkës Katolike, Arqipeshkvi Metropolit i Tiranë-Durrësit, Imzot Arjan Dodaj, u bëri thirrje besimtarëve të mos dorëzohen përballë vështirësive dhe të besojnë se ndryshimi nis nga secili individ.

“Vdekja nuk e ka më fjalën e fundit… ndryshimi është i mundur dhe fillon nga zemra e njeriut”, tha Dodaj.

Në fjalën e tij, Dodaj ndaloi edhe tek fenomenet që prekin shoqërinë shqiptare, si emigracioni dhe indiferenca, duke theksuar se e ardhmja nuk duhet pritur nga jashtë.

“Vendi ynë nuk duhet të presë që e drejta apo e ardhmja do të na vijë nga jashtë. Thua vallë se të huajt e kanë për detyrë ta duan më shumë Shqipërinë dhe shqiptarët se vetë shqiptarët Shqipërinë dhe njëri-tjetrin. Jo, kjo para së gjithash është një përgjegjësi e secilit prej nesh. Të qenit shqiptar nuk është çështje slogani apo propagande, por trashëgimia që na shpërcjell ndër shekuj dhe borxhi që u detyrohemi bijëve tanë, brezave të rinj”, tha Dodaj.

Apeli i tij shkoi edhe për politikën dhe institucionet, për më shumë ndershmëri dhe përgjegjësi në drejtimin e vendit.

“Shqipëria ka nevojë për burra dhe gra të ndershëm që e duan këtë tokë dhe popullin e saj jo me fjalë, por me jetë të jetuara këtu, ka nevojë për ndërgjegje reaguese që nuk pranojnë korrupsionin, padrejtësinë dhe menjanimin si diçka normale. Është ky një urim për të gjithë dhe akoma më shumë është për ata që mbajnë përgjegjësi politike, ekonomike dhe shoqërore që të shohin me largpamësi dhe përgjegjësi të ardhmen e vendit”, theksoi ai.

Ndërkohë, këtë mbrëmje besimtarët katolikë marrin pjesë në meshën e vigjiljes në Katedralen e “Shën Palit” në Tiranë, e cila nis në orën 21:45 dhe zgjat deri në orët e para të mëngjesit, duke kulmuar me shpalljen “Krishti u ringjall”.

Që prej mëngjesit, besimtarët i janë drejtuar kishave për bekimin e ushqimeve, një traditë e hershme e Pashkës, që simbolizon bekimin e familjes përmes tryezës.

Përgatitjet e festes i kanë nisur prej ditësh dhe me gëzim presin shpalljen e lajmit Krishti u ringjall. Teksa flasin për simbolikën e festës së Pashkës besimtarët e krishterë, adresojnë lutjet e tyre për shëndet, paqe e begati në familje.

Bekimi i ushqimeve është një traditë e hershme për këtë feste pasi kërkohet bekimi i gjithë familjes, përmes ushqimit. Pashkët, kremtohen tek besimtarët e katolik si ringjallja e Krishtit, ku përgatitja nis me 7 javëshin e Kreshmëve ose agjërimit.

Rendit zhvillimet sipas orarit:
Ora 11:55
E shtuna e Madhe e Pashkës, besimtarët katolikë në kishën e Lezhës për bekimin e ushqimeve

Besimtarët katolikë në Lezhë janë mbledhur këtë të shtunë në Katedralen “Shën Nikolli” për të kryer një nga traditat më të dashura dhe më të rrënjosura të Pashkës, bekimin e ushqimeve. Në një atmosferë të ngrohtë shpirtërore dhe përgatitjesh festive, qindra familje kanë sjellë në kishë shportat me ushqimet simbolike, që do të konsumohen të dielën e Pashkës.

Besimtarët shprehen se kanë sjellë për të bekuar “të mirat që Zoti ua ka dhënë”, si një mënyrë falënderimi dhe mirënjohjeje, duke shtuar se lutjet dhe urimet e kësaj dite janë për të gjithë, për paqen, shëndetin dhe shpresën në çdo familje.

E shtuna para Pashkës përfaqëson përgatitjen e zemrës për festën e shenjtë, forcimin e besimit dhe ndarjen e të mirave me të tjerët. Ajo është një ditë e heshtur reflektimi, që i paraprin mëngjesit të shpresës dhe jetës së re – të dielës së Ringjalljes.

SI.E./Shqiptarja.com