Edhe PS me draft për imunitetin
Kujdes i veçantë për Gjyqësorin

TIRANE - Partia Socialistë jo vetëm që ka një variant të saj të projektligjit për heqjen e imunitetit të zyrtarëve të lartë, por sot ia ka dorëzuar atë trojkës së ambasadorëve perëndimorë gjatë takimit të sotëm me kryesocialistin Edi Rama. Lajmi është konfirmuar për Shqiptarja.com nga burime të sigurta në selinë rozë.

Ambasadori amerikan Arvizu, i BE-së Sequi dhe ai i OSBE-së Ëollfarth u takuan sot me Ramën me kërkesë të këtij të fundit. Ata u panë të hynin në selinë e PS pa asgjë në duar por kur dolën që atje mbanin me vete një dosje, e cila - siç mësoi Shqiptarja.com - përmbante edhe draftin e PS për heqjen e imunitetit të zyrtarëve të lartë.

Përveç variantit të socialistëve, ekziston edhe një version i LSI-së dhe një tjetër i Partisë Demokratike, të dy këta të fundit të paraqitur në Kuvend për shqyrtim. Nuk dihet nëse dhe kur PS mund të dorëzojë në Parlament variantin e saj, por Shqiptarja.com ka mësuar se ku dallon ai ndaj dy të tjerëve.

Drafti i socialistëve, për të cilin në PS është kujdesur Fatmir Xhafaj, i kushton një kujdes të veçantë pavarësisë së gjyqtarëve. Burimet bënë të ditur se socialistët pranojnë heqjen e imunitetit për deputetët por kërkojnë garanci përsa i përket gjyqtarëve.

Në një intervistë publikuar dje në Shqiptarja.com, kryegjyqtari i Krimeve të Rënda, Sandër Simoni, u shpreh në favor të një reduktimi të imunitetit të gjyqtarëve por jo heqjes totale të tij, pasi ai nuk është vetëm një garanci personale por edhe një mjet për të siguruar funksionimin normal të detyrës në mënyrë të pavarur

Sipas Simonit, imuniteti duhet të interpretohet si një garanci që jep shteti i së drejtës jo për gjyqtarin, por për pavarësinë e gjyqësorit dhe ndarjes së kompetencave.

Me sa duket, varianti i propozuar nga Partia Socialiste shkon pikërisht në këtë drejtim.

(im/shqiptarja.com)

TAG:
• OSBE