Edi Rama: E ndjej dhimbjen e
Vucicit për njohjen e Kosovës

Kryeministri Edi Rama në një intervistë për gazetën serbe ‘Blic’ ka deklaruar se e ndien dhimbjen e Presidentit Vucic për njohjen e pavarësisë së Kosovës.
 
“E ndjej dhembjen dhe vendosmërinë e Vucic për të zgjidhur problemin e Kosovës.
 
Iniciativa e Vucic për nisjen e dialogut të brendshëm për Kosovën është një akt i lidershipit me të cilin ai shpalosi një vizion kurajoz për të ardhmen e Kosovës dhe Serbisë.
 
Kam respekt për iniciativën e tij që të ballafaqohet me të kaluarën në mënyrë frontale dhe jokonvencionale” u shpreh ai.
 
Por cila është zgjidhja më e mirë sipas Ramës për Kosovën? “Njohja e plotë e Republikës së Kosovës nga Serbia! Por, e di se kjo është më e lehtë të thuhet sesa të bëhet. Prandaj, aktualisht zgjidhja është që të punojmë fuqishëm së bashku”.
 
Kryeministri shqiptar foli edhe për deklaratat e ministrit të Jashtëm të Serbisë Dacic për ndarjen e Kosovës dhe krijimin e Shqipërisë së Madhe.
 
“Zhurma rreth deklaratës për ‘bashkimin e Shqipërisë me Kosovën’ ishte një konkluzion trivial, e jo një plan, kërcënim apo dëshirë. Por, nëse mbyllet horizonti i integrimit të rajonit tonë në BE nuk është e vështirë të parashikohet rizgjimi i fantazmave nga e kaluara” tha ai.
 
Ndërsa përsa i përket raporteve mes Shqipërisë dhe Serbisë, Rama u shpreh se janë më të mirat që kanë qenë ndonjëherë.
 

Intervista e Rames ne gazeten serbe 'Blic'

dy.b/shqiptarja.com