Egnatia-Skënderbeu ngre sot siparin e Superiores! Ndryshimi, fituesi dhe Europa përcaktohet nga 'Final 4'

Nis sot edicioni i ri futbollistik në vend që do të jetë i 85-ti. Sfida hapëse e sezonit 2023-2024 është Egnatia-Skënderbeu që do të luhet në Rrogozhinë duke nisur nga ora 17:00 ndërsa në mbrëmje në orën 20:00 Vllaznia e drejtuar nga Migen Memelli do të presë Kukësin.

Java e parë që duhej të ishte zhvilluar që fundjavën e kaluar vijon nesër me dy sfida të tjera ku spikat derbi i kryeqytetit Dinamo-Tirana ndërsa Laçi pret Erzenin.

Sfida mes Partizanit e Teutës është shtyrë nga FSHF me konsensus edhe mes klubeve për shkak se kampionët në fuqi janë të impenjuar në Europë.

Ky do të jetë një edicion me risi dhe eksperimental njëkohësisht pasi për të shpallur fituesin e titullit kampion do të luhet një fazë play-off. Katër ekipet e renditura më mirë do t’u zerohen pikët dhe do të përballen me njëra -tjetrën në “Air Albania” për të përcaktuar fituesin.

Pra 36 javë javë kampionat nuk do të jenë të mjaftueshme që ekipi që e mbyll në vend të parë të shpallet kampion. Edhe zona e Europës po ashtu do përcaktohet nga kjo fazë play-off. Partizani është kampioni në fuqi dhe gjithë ekipet e tjera do tentojnë të rrëzojnë të kuqtë nga froni.

Pak përpara nisjes së sezonit kreu i FSHF-së Armand Duka ka pasur një mesazh për të gjithë aktorët dhe është shprehur i bindur për një sezon emocionues dhe fair-play. E drejta televizive e kampionatit për tre vitet e ardhshme është shitur vetëm dy ditë përpara startit.

Përgatiti Andi Kapxhiu

M.T/M.Q./Shqiptarja.com

TAG:
• egnatia
• skenderbeu
• Rrogozhine