Këshilli i Lartë i Prokurorisë konfirmoi një ditë më parë kandidaten Aida Hajna, e përzgjedhur nga SPAK dhe partnerët ndërkombëtar, për drejtimin e Byrosë Kombëtare të Hetimit, e kujtuar ndryshe FBI-ja shqiptare, e cila do të asistojë SPAK në hetimit e krimit dhe korrupsionit në të gjitha nivelet. Shqiptarja.com zbardh një relacion që SPAK i ka dërguar KLP-së, mbi sprovat që ka kaluar zonja Aida Hajna për të bindur SPAK dhe përfaqësuesit e SHBA-BE, për t’i besuar drejtimin e FBI-së shqiptare. Sipas relacionit, fillimisht Hajna ishte pjesë e një grupi prej 41 peronash, të cilët shprehën ambicien për këtë pozicion. Në vijim, Hajna është përzgjedhur në grupin e 18 kandidatëve, të cilët plotësonin kriteret për të vazhduar garën.

Në 3 shkurt, komisioni i përzgjedhjes pranë SPAK ka vendosur që 18 kandidatët duhet t’i nënshtroheshin një testimi fizik dhe me shkrim. Sipas vendimit të komisionit, kreu i Byrosë së Hetimit duhet të kishte edhe një performancë fizike. 18 kandidatët u janë nënshtruar testimeve në datat 6 dhe 10 shkurt. Testet i kanë kaluar vetëm 8 kandidatë, mes të cilëve edhe zonja Hajna. Në datën 10 shkurt, pas një marrëveshje të SPAK me Ministrinë e Brendshme, 8 kandidatët e mbetur iu nënshtruan testit të poligrafit ose siç njihet ndryshe makinës të së vërtetës. Rezultatet e testit janë administruar dhe vlerësuar nga komisioni i verifikimit të pasurisë dhe integritetit.

Në datat 26 dhe 27 shkurt janë zhvilluar intervistat me kandidatët. Pas intervistave, në garë kanë mbetur vetëm 4 kandidatë, Aida Hajna, Artur Beu, Ervin Hodaj dhe Idajet Faskaj. Në vijim, katër kandidatët i janë nënshtruar verifikimit të ligjshmërive të pasurive, test të cilin zonja Hajna e ka kaluar gjithashtu me sukses. Në fazën përfundimtare, një komision me përfaqësues të SHBA-BE pranë SPAK kanë përgatitur një opinion pozitiv për zonjën Hanja.

“Në përfundim të procesit, komisioni i përzgjedhjes pranë SPAK, bazuar edhe në opinionin e komisionit të pavarur të rishikimit (me përfaqësues të SHBA-BE), arriti në përfundimin se kandidatja Aida Veizaj (Hajna), i plotëson më mirë se të tjerët kushtet për të qenë drejtor i Byrosë Kombëtare të Hetimit. Në këto kushte, komisioni i përzgjedhjes i propozon KLP emërimin e zonjës Veizaj si drejtore e BKH”, thuhet në relacion.