Eksodi, Stefanoviç: Në Hungari 40
mijë kosovarë, në Austri 30 mijë

Gjatë një muaji e gjysmë, policia serbe ka arrestuar 2 311 persona të cilët kanë tentuar të kalojnë kufirin Serbi-Hungari ilegalisht.
Ministri i Punëve të Brendshme i Serbisë Nebojsha Stefanoviç ka deklaruar se, gjatë një muaji e gjysmë, policia serbe ka arrestuar 2.311 persona të cilët kanë tentuar që ilegalisht ta kalojnë kufirin Serbi-Hungari.

Masat e ndërmarra nga policia kanë rezultuar me zvogëlimin e numrit të tentimeve të klandestinëve kosovarë për të kaluar ilegalisht kufirin me Hungarinë, ka thënë Stefanoviç për televizionin publik serb.

Ai gjithashtu ka vlerësuar bashkëpunimin me 20 policët gjermanë të cilët prej para dy ditësh, me automjete speciale dhe kamera termovizive, u erdhën për ndihmë kolegëve serbë, transmeton KosovaPress.

Ministri serb ka thënë se vazhdimisht është në lidhje me kolegët e tij nga Gjermania, Austria dhe Hungaria, prej muajit shkurt të këtij viti në mënyrë drastike u rrit numri i emigrantëve ilegalë.

Sipas informatave të Stefanoviçit, në kampet e Hungarisë gjenden mbi 40 mijë njerëz, ndërsa në Austri 30.000.

Këta njerëz rrezikojnë të marrin padi penale dhe kundërvajtëse, ndërkohë që vetëm 0,5 deri 1 për qind të kërkesave të kosovarëve për azil ka gjasa që të pranohen, ka thënë ministri i policisë serbe./KosovaPress/

Redaksia online
(f.m/shqiptarja.com)