Qytetarët e Tiranës duket se kanë ende shumë paqartësira për funskionin e administratorit të pallatit. Në emisionin e kësaj jave në Report TV, “Këndi i Ekspertit”, nën moderimin e gazetares Valbona Mhilli, Rubrika “Administratori im”, ka pasur një mori telefonatash rreth problematikave për administrimin e pallateve. Eksperti Klinton Leka ka sqaruar për qytetarët se si veprohet me pallatet me pak familje për pagesat dhe çfarë ndodh nëse banorët e një pallati nuk bien dakord për zgjedhjen e një administratori.

Kemi folur në takimet e para me zotin Gjata se si zgjidhet kryesia dhe do të doja të dija se deri ku kemi arritur ta zgjedhim këtë administrator.
Bashkia e Tiranës ka në fokus kryesor projektin për administrimin e bashkëpronësisë. Për këtë projekt janë angazhuar 14 grupe të Task Forcës që janë prezente çdo ditë në çdo njësi administrative dhe në çdo objekt të Tiranës. Deri në këtë moment që ne po flasim, po punojmë në njësitë Dajt, Farkë dhe Kashar. Jemi shtrirë në 3 000 objekte, kemi 600 administratorë të certifikuar, kemi 20 shoqëri administrimi të certifikuara, kemi dhe 300 kontrata të depozituara pranë Bashkisë. 

Ç’është fondi i komunitetit? Çfarë financon?
Për të gjithë qytetarët që duan të përfitojnë fondin e komunitetit duhet të ezaurojnë më përpara disa etapa: të zgjedhin një kryesi për objektin e tyre, të zgjedhin një administrator, administratori të certifikohet në Bashki, të lidhë një kontratë me kryesinë e objektit, pastaj të formojë një projekt-ide dhe ta depozitojë atë pranë njësisë bashkiake. Është një komision i posaçëm që e vlerëson dhe është një grup inspektimi që e vlerëson nëse është fitues apo jo. Në tremujorin e fundit të vitit 2017 janë financuar 10 projekte. Për këtë vit janë shtuar kërkesat dhe Bashkia e Tiranës është e hapur të financojë çdo projekt që duket se është ideal për një njësi të Tiranës, që t’i vijë në ndihmë banorëve sepse Bashkia financon 50% të projektit.

Telefonoj nga Tirana, zona e “21 Dhjetorit”. Kisha një pyetje për personat invalidë. Paguajnë më pak?
Siç e parashikon edhe ligji, për personat invalidë, asambleja merr një vendim ku redukton tarifën e administrimit që do të thotë që këta persona paguajnë më pak se bashkëpronarët e tjerë.

Banoj në një pallat pranë rrugës Bogdani. Ka 16 vjet që ka marrë lejen e ndërtimit por e ka me probleme. Nuk ka asnjë lloj dokumenti. Ligji e ka që nuk duhet të vendoset administratori pa u përfunduar dhe pa u certifikuar pallati. Për kaq sa e kam kuptuar unë. Vijnë specialistët e Bashkisë dhe na thonë të zgjedhim administratorin. Kemi edhe vendimin e gjykatës që është i pezulluar. Edhe hipotekën e ka provizore...
Do ta verifikojmë konkretisht rastin. Në momentin që një objekt nuk ka hipotekë ose ndërtuesi nuk ua ka dhënë ende hipotekën bashkëpronarëve, është ai personi që administron objektin deri në momentin e lëshimit të hipotekës. Pastaj u lind e drejta banorëve që të mbledhin kryesinë dhe të zgjedhin administratorin.

Banoj në rrugën “Ismail Qemali”, në qendër të Bllokut. Na duhet patjetër një administrator. Pallati ynë ka 10 familje gjithsej dhe nuk kemi zgjedhur kryesi.
Zona e Bllokut është ezauruar nga Task Forca. Objekti i zotërisë mund të jetë një objekt që ka dështuar dy herë në mbledhje, nuk kanë arritur të zgjedhin një kryesi. Pas kësaj i lind e drejta Kryetarit të Bashkisë që të bëjë një kontratë me një shoqëri administrimi që pas 6 muajsh t’u dërgojë një administrator. Banorët kanë afat 3 muaj për të zgjedhur përsëri kryesinë për të zgjedhur vetë administratorin. 

Telefonoj nga zona e “21 Dhjetorit”. Ne nuk kemi zgjedhur administrator. Jemi mbledhur shumë herë si pallat por nuk po e zgjedhim dot administratorin. Ju a mund të na sillni një administrator dhe çfarë pagesash ka?
Për kryesitë që nuk arrijnë të zgjedhin një administrator, Bashkia e Tiranës ka vënë në dispozicion në faqen e saj Tirana.al një listë me emrat e të gjithë administratorëve të certifikuar të Tiranës. Mund të aplikoni aty, mund të vini edhe pranë zyrave tona dhe mendoj që do të merrni një zgjidhje. Detyrim ligjor për të zgjedhur administratorin e ka kryesia me asamblenë e bashkëpronarëve. Bashkia e Tiranës nuk ndërhyn për të sugjeruar apo për të sjellë një administrator. Bashkia e Tiranës ndërhyn vetëm në rastet kur nuk ka një kryesi, kur kanë kaluar 6 muaj dhe ju nuk e keni zgjedhur. Për momentin ju mund të vini të aplikoni pranë Bashkisë dhe mund të zgjidhni vetë një administrator.

Banoj në rrugën “Irfan Tomini”. E kemi zgjedhur kryesinë dhe kryesia do të zgjedhë administratorin. Sa do të jetë pagesa për administratorin sepse ne 10 familje jemi në pallat. 
Në këtë rast kemi të bëjmë me një pallat të vogël, me pak banorë. Vendimin e merr asambleja e bashkëpronarëve për të gjithë fondin dhe për rrogën e administratorit. Kjo varion edhe se sa objekte ka në administrim ai. Bashkia nuk ndërhyn në caktimin e tarifave. Ngrihet një fond nga asambleja, ndahet fondi rezervë dhe shërbimet e tjera.

Kam një ankesë për administratorin e pallatit, te Bulevardi “Zogu I”.  Administratori që ka 15 vjet këtu, që është vetëzgjedhur, ka rreth 100 apartamente dhe që u merr paratë rregullisht. Të gjitha shpenzimet i paguajmë plus. Kemi 15 vjet që nuk pastrohen depozitat. Kontratë për mirëmbajtjen e ashensorëve nuk ka. Specialisti vjen vetëm kur prishet ashensori. Janë prishur themelet e pallatit dhe nuk ka ndërhyrë asnjë njeri. Janë hapur tubacionet dhe rrjedhin ujërat e zeza. Jemi ankuar edhe në Bashkinë e Tiranës.
Zonjë, ne i kemi zyrat në Bulevardin “Zogu I”, ish-godina e gazetës “Zëri i Popullit”, në katin e 3-të. Ju lutem, nesër mund të vini në çdo orar dhe të bëni ankesën për administratorin tuaj. Ne do ta trajtojmë shumë seriozisht këtë çështje sepse administratori ka një detyrim ligjor që çdo 4 muaj të bëjë transparente të gjitha financat e objektit, te të gjithë bashkëpronarët e objektit, gjë që ky administrator nuk e ka bërë. Nesër, meqë zonja qenka e sëmurë dhe nuk mund të vijë, do të dërgojmë Task Forcën në objekt dhe do të verifikojmë çdo detaj. 

Lidhur me pagesat e administratorit, kush i vendos sepse ka njerëz që banojnë me qira, ka dhe njerëz të papunë që s’mund t’i paguajnë.
Bashkia e Tiranës nuk ndërhyn në tarifat për administrimin e bashkëpronësisë. Jeni ju vetë, asambleja e bashkëpronarëve që vendosni për tarifat në objektin tuaj. Nuk ndërhyn as Bashkia dhe asnjë prej institucioneve për administrimin e bashkëpronësisë. Pra ju vetë mblidheni, ju vetë zgjidhni kryesinë, ju vetë caktoni fondin që ju duhet për mirëmbajtjen e objektit tuaj dhe caktoni rrogën e administratorit, caktoni dhe tarifat e reduktuara sipas kateve. Pra, jeni ju vetë që vendosni. Nuk mund të vendosë Bashkia për administrimin tuaj. Asamblesë ia lejon ligji që të bëjë tarifa të reduktuara për pensionistët, për njerëzit me aftësi të kufizuara. Bashkia nuk ndërhyn në vendosje tarifash dhe në vendosje rrogash. Çdo gjë është në dorën tuaj.

A është detyra e administratorit të pallatit që të ndjekë procedurën e hipotekës së pallatit? Unë banoj në rrugën e Elbasanit dhe pallati im është ndër ato pallate që nuk ka hipotekë sepse ka devijim dhe duhet ndjekur një procedurë legalizimi tek ALUIZNI. Ne jemi shumë banorë dhe nuk arrijmë të mblidhemi të gjithë bashkë. Administratorin e kemi zgjedhur dhe është certifikuar. 
Administratori mund t’i përfaqësojë banorët e pallatit. Për shqetësimet e banorëve, bie dakord administratori me kryesinë dhe asamblenë e bashkëpronarëve. Nuk është se ai e ka detyrim ligjor të ndjekë hipotekimin e një banori apo të shumë banorëve. Por është një marrëveshje që vendoset mes tyre. Si një administrator i certifikuar ai ka akses për të ndjekur të gjitha etapat që duhen për hipotekimin e banesave, gjithnjë në marrëveshje me banorët. 

Banoj në Kinostudio, te pallatet e vjetra me tulla të kuqe. Para një viti, dy herë kam investuar për rregullimin e tarracës. Fqinji ngjitur me mua nuk e bën. Brenda 6 muajve është e treta herë që paguaj nga 700 000 lekë, për një dhomë e një kuzhinë, banoj e vetme, jam 70 vjeçe. Specialistët më thonë që po nuk e bëri fqinji as unë nuk mund ta bëj. Duhet bërë nga të gjithë. Kryesi nuk kemi. As Task Forca nuk ka ardhur. Rruga “Aleksandër Moisiu”...
Ne do të bëjmë të mundur ardhjen e Task Forcës që të zgjidhet një kryesi. Në bazë të ligjit tarraca është një pronë e përbashkët dhe duhet të investojnë të gjithë bashkëpronarët për mirëmbajtjen e saj, jo vetëm ju. I ftoj të gjithë administratorët në Tiranë, të cilët nuk janë certifikuar ende, të paraqiten pranë Bashkisë, të certifikohen që edhe ata të kenë një fuqi ligjore për t’u përballur me banorët, për të pasur të mundur vjeljen e tarifave. Pra që të ketë funksionimin e duhur duhet që të jetë administrator i certifikuar. Kështu ka të drejtën të lidhë kontratën me kryesinë. Kryesia nuk mund të lidhë kontratë me një person të patrajnuar, të pacertifikuar.

Redaksia Online
l.q/Shqiptarja.com