Elvis Çefa në A1Report: Duhet të
shkarkohemi të gjithë...dhe Nishani
'

TIRANË- Nënkryetari i Këshillit të Lartë të Drejtësisë, Elvis Çefa, komisionin hetimor të nisur nga mazhoranca e ka quajtur si një përpjekje e mazhorancës për të marrë në dorë KLD-në. I ftuar në emisionin “5 Pyetjet nga Babaramo” në televizionin A1 REPORT, Çefa tha se për shumicën e vendimeve që mazhoranca e vë nën shkelje, kanë votuar edhe presidenti Nishani në cilësinë e kreut te Këshillit të Lartë të Drejtësisë, ashtu si dhe kreu i Gjykatës së Lartë. Nëse hetimi i Kuvendit do të ishte në përputhje me Kushtetutën, nënkryetari i KLD-së thotë se mos duhen të shkarkohen edhe Nishani me Zaganjorin.

Në vlerësimin e Çefës përmes këtij komisioni hetimor, mazhoranca kërkon të marrë në dorë kontrollin e këtij institucioni të drejtësisë, duke shkarkuar dy anëtarë të zgjedhur nga ish-mazhoranca Berisha, me qëllimin e mëtejshëm sipas tij, për të vënë anëtarë të zgjedhur nga qeveria Rama. Nënkryetari i Këshillit të Lartë të Drejtësisë thotë se hetimi që po i bën Parlamenti veprimtarisë së tij dhe anëtarit Lulzim Lelçaj në këtë institucion është i pamundur, në kushtet kur sipas tij Parlamenti nuk mund të të nxjerrë përgjegjësi për vendimarrje gjyqtarësh.

“Procedura ndaj meje dhe Lelçajt është unike. Kjo e bën të pamundur hetimin se është vendimarrje gjyqtarësh, kolegjiale. Është e pamundur të nxirret një përgjegjësi e anëtarit në mënyrën se si ai ka votuar nga parlamenti. Në ato që ne akuzohemi kanë votuar edhe të tjerët, përfshirë edhe presidenti edhe kreu i Gjykatës së Lartë. Për sa kohë ligji është i barabartë me të gjithë, me ligj duhet të shkarkohen të gjithë. Mazhorancës i duhet shkarkimi i dy anëtareve që nuk i ka zgjedhur vetë për të vënë dy të sajët”, tha Çefa përballë gazetarit Ilir Babaramo.



Çefa flet edhe për ankimimet që Këshilli i Lartë i Drejtësisë i ka bërë dy ligjeve të miratuara me votat e mazhorancës në kuvend: Ligjin e ri për KLD dhe për Shkollën e Magjistraturës. Ky vendim në fakt është i njëjtë me të opozitës, e cila gjithashtu ka zgjedhur t’i cojë në Gjykatën Kushtetuese këto dy ligje. Por për nënkryetarin e KLD-së kjo është një rastësi, pasi sipas tij ky institucion i drejtësisë e bazon kërkesën e tij në argumente ligjorë:

“Ligji i ri për KLD-në cënon në thelb kompetencat kushtetuese të KLD në drejtimin e sistemit gjyqësor, kompetencat e presidentit të republikës në drejtimin e KLD. Ndërsa i dyti, shkatërron me ligj Shkollën e Magjistraturës, ndërpret mandate dhe rikompozon Këshillin drejtues me përfaqësues institucionesh të panevojshme duke ulur numrin e gjyqtarëve. Ky këshilli ka qenë në një ekulibër të gjetur: 2 gjyqtarë, 2 prokurorë. Tani i kanë lënë nga 1 dhe kanë shtuar një përfaqësues nga Ministria e Arsimit, një nga ekzekutivi. Parimi i balancimit është shkelur, kontrollohet nga ekzekutivi dhe kjo është e rrezikshme”, argumentoi nenkryetari i KLD-së.

Për Çefën diskutimi paraprak i ligjeve me të gjithë aktorët, do të ishte një hap përpara.

Me kërkesë të 39 deputetëve Parlamenti i ka hapur rrugë krijimit të Komisionit për shkarkimin e Çefës dhe anëtarit tjetër të KLD-së, Lulzim Lelçaj. Këshilli i Lartë i Drejtësisë nuk ka marrë vendim për emërimin e magjistratëve, dhe kjo është një ndër shkeljet që Komisioni Hetimor i ngritur për të verifikuar veprimtarinë e punës së nënkryetarit Elvis Çefa dhe anëtarit Lulzim Lelçaj, ka konstatuar nga dokumentacioni i mbledhur nga disa institucione. Kryetari i këtij Komisioni, Armando Subashi ka listuar edhe shkeljet e tjera nga dy anëtarët e KLD, si marrja e kompetencave të Ministrit të Drejtësisë apo Shkollës së Magjistraturës nga Këshilli i Lartë i Drejtësisë.


Pjese nga intervista e nenkryetarit te KLD-se, Elvis Çefa ne "5 Pyetjet nga Babaramo" ne A1 REPORT

E nisim nga Komision Hetimor, ju e keni cilësuar atë të paligjshëm, pse?
E gjithë procedura është një procedurë jo e bazuar në Kushtetutë. Bie në kundërshtim dhe me ligjin për KLD-në.
 
Si procedura për Spahiun?
Procedura për Spahiun nuk ka qënë e ngjashme, ai ka dhënë dorëheqjen. Formalisht ka filluar një procedurë hetimore parlamentare, por jo si kjo që po zhillohet ndaj meje dhe zotiti Lelçaj. Procedura e nisur sot ndaj meje është unike, jo Kushtetuese.
 
Edhe nëse ju keni gabuar ?
Kjo është çështje tjetër. KLD është një institucion i veçantë, me një procedurë tjetër. Kjo e bën të veçantë dhe të pamundur nga ana e Kuvendit.  Në shumicë e vendimeve që ne akuzohemi që këmi shkelur ligjin kanë votuar unanimisht, kanë votuar edhe presidenti Bujar Nishani në cilësinë e Këshillit të Lartë të Drejtësisë, ashtu si dhe kreu i Gjykatës së Lartë. Atëherë duhet të shkarkohen dhe këta?  Mazhorancës i nevojitet shkarkimi i dy anëtarëve për t’i zëvendësuar me dy të tjerë si dhe për të zbatuar ligjin e ri të KLD-së.
 
Si mund ta vendos nën kontroll KLD qeveria?
Ju mendoni se kjo procedurë e dhunshme, nuk ndikon psikologjikisht në gjithë anëtarët e KLD-së? Është zgjedhur kjo mënyrë arrogante për të hequr dy anëtarët e KLD-së. Ata duan të japin një mesazh që ne do të heqim anëtarët dhe do ta zaptojmë atë.
 
Ka një mendim që KLD është e ish-kryeministrit Berisha, ju si mendoni?
E kam dëgjuar këtë shpreheje, por mua s’më rezulton.  
 
Një shembull konkret, si e shpjegoni karierën blic të zotit Broci? Menjëherë pas heqjes për vendimin ndaj sekuestros së Damir Fazllic, ndërsa tani KLD e promovoi si anëtar i Bordit të Magjistraturës?
Për të sqaruar faktin përse zoti Broçi kaloi kaq shpejt në karierë, unë besoj se ka ardhur momenti me eksperincën. Nuk ka qënë kjo KLD që e ka promovuar. Që është promovuar si anëtar i bordit të magjistraturës kjo nuk ka qënë e vërtetë.
 
KLD thoni është një institucion i pavarur. Ju a keni përvojë në gjyqësor?
Për sa i përket pyetjes në mënyrën se si ka formuluar përzgjehdjen e tre anëtarëve të KLD thuhet që nuk duhet të jenë gjyqtarë, për të balancuar. Kushtetuta është kujdesur për të ruajtur një farë balance.

Pse rrëzuat kërkesën për pezullim të Gjin Gjonit?
Nuk ka pasur një kërkesë për pezullim, por për shkarkim. Mund të ketë gjykatës, apo edhe punonjës të tjerë të administratës që mund të kenë deklaruar më tepër para.

Nëse me karrierën e tij, kjo pasuri shtohet?
Mbetet për t’u gjykuar, nuk merrem me emra konkretë. Por  vetëm një anëtar ka votuar pro kërkesës së Ministrit të Drejtësisë, pjesa tjetër ka votuar kundër. E meta procedurale e atij gjykimi është se Ministri i Drejtësisë nuk pati sjell asnjë provë, duke mos vërtetuar as kërkesën e ILDKP-së. Ai nuk kishte asnjë material për të provuar kërkesën.Kur akuza nuk bazohet vetëm në thënie, atëherë gjykimi shkon në favor të të gjykuarit.Për zotin Gjoni dhe për gjykatësit e  tjerë, janë kërkuar nga Prokuroria masë sigurie, të cilat janë hedhur poshtë nga Gjykatat e Apelit. Edhe KLD në këto kushte nuk mund të merrte vendim tjetër.

Në kërkesën e Komisionit Hetimor numërohen një sërë shkeljesh, një prej tyre emërimi i magjistratëve, a është një lloj pengmarrje?
Vendos një standard objektiv, jo vetëm për emërimin e krerëve të gjyqtarëve, por edhe për vlerësimin. Më pas vijuam me emërimin e kryetarëve të gjyqtarëve.  A mund të ndihen të pasigurt kryetarët e Gjyqtarëve kur janë të komanduar?! Gjatë intervistave në KLD ata janë pyetur dhe janë përgjigjur se nuk ndjejnë pasiguri për faktin që janë të paemëruar. Kryetari i Gjykatës ka më shumë role gjyqësore, nuk ka asnjë lloj tagri që të ndikojë tek gjyqtarët e tjerë. Edhe ndërkombëtarë e kishin kritikuar tërë proces. Nuk ka qenë rasti i parë, Komisioni Hetimor më ka bërë të lexoj se a me të vërtetë qenkam kaq i zi. Ju garantoj se ky fenomen i komandimit të gjyqtarëve edhe më parë ka qenë mëse i zakonshëm.

Të qëndrojmë te vonesat e krerëve të gjykatave. Ministri i Drejtësi që pyet pse nuk emërohet kryetari i Gjykatës së Durrësit, pavarësisht se ka dorëzuar kërkesën? Pyeta dhe më shpjeguan se aty është komanduar një ish-avokatja e zyrës së Argita Berishës e cila nuk ka mbushur as moshën. Mos po prisni që ajo të mbushi moshën?
Ministri i Drejtësisë abuzon, nuk ka paraqitur një kërkesë të tillë. Kërkesa është bërë nga zv./ministri në kundërshtim me ligjin. Ligji thotë qartë se kërkesa bëhet nga Ministri i drejtësisë jo më larg se 48 orë nga mbledhja. Minstria e Drejtësisë  ka përdorur këto taktika jo serioze për të vënë në vështirësi KLD. Pse ministri nuk solli edhe një herë kërkesën me firmën e vet?

Kryetari i Gjykatës Durrës prej vitesh është i komanduar, pse nuk emërohet?
Janë disa krerë gjykata të pa emëruar, por do e mbyllim me emërimet me përfundimin e procesit. Për Durrësin është shpallur konkursi para disa vitesh. Një pjesë e konkurrentëve janë transferuar, për këtë arsye është rishpallur disa herë vendi vakant. Është marrë një vendim për shtyrje deri në vlerësimin e të gjithë kandidatëve.
 
Thoni se për emërimet e gjyqtarëve keni ndjekur standarde. Pse nuk keni promovuar magjistratët?
Ka një shpjegim ligjor, ministri keqinformon. Magjistratët janë studentë që përfundojnë vitin e tretë të Shkollës së Magjistraturës të cilët vijnë për t’u emëruar. Gjykata e Durrës dhe ajo e Tiranës janë Gjykata karriere, dhe transferimi në to quhet promovim, ndërsa emërimi i tyre ishte fillestar. Magjistratët duhet të jenë atje ku ka më tepër nevojë. Pjesa më e madhe e gjykatave janë të vogla. Gjykata e Burrelit ka 4 gjykatlës, të cilët nuk janë ndërruar për thuajse 25 vite. Kanë gjykuar pothuajse të gjithë banorët. Kanë gjykuar për herë të dytë apo të tretë të njëjtin konflikt. Duke krijuar një gjykim jo objektiv. Asnjë Ministër Drejtësie tjetër nuk ka propozuar që të 13 gjyqtarët që mbarojnë Magjistraturën të vijnë në Gjykatën e Tiranës, KLD ia rrëzoi vendimin me votë plebishitare.
 
Në kohën e qeverisë së majtë votoheshin Avokatët e Nanos, në kohën tuaj Avokatët e Berishës dhe rezultojnë se këta janë më të korruptuarit. Kur do marri fund kjo?
Nuk duhet të abuzojmë kur themi që janë të korruptuar. Nëse do ishin të tillë dio e kishin vendin diku tjetër.  Për Gjin Gjonin nuk kishte asnjë provë që përtej çdo dyshimi të provonim fajësinë. Jam munduar që të gjithë votimet e mia t’i bazoj në kritere. Nëse subjektivizmi nuk do ishte i njohur me Kushtetutë nuk duhet të kishte KLD.

A ka akoma magjistratë që ende nuk janë emëruar?
Për hir të së vërtetës janë akoma pa u emëruar ata që kanë mbaruar këtë vit. Kjo për shkak të ndryshimeve urgjente që u bën në ligjin për Shkollën e Magjistraturës duke e shkatërruar. 

A e keni  shkatërruar ju Shkollën e Magjistraturës duke hequr një pedagoge?
Zonjës Semini i kishte përfunduar mandati.  Ajo ka qenë subjekt diskutimi, kjo ka qenë rasti pse KLD nuk e votëbesoi. Nuk ka pasur asnjë ligj që e ndalonte anëtarin e KLD-së Neshat Fanar të kandidonte për në Magjistraturë.

Përse kërkoni mos përfshirjen e politikës? Njerëzit kur votojnë delegojnë njerëzit e tyre në Parlament?
Unë s’kam kërkuar, nuk e këkroj unë por doktrina dhe Kushtetuta si dhe progres raporti. Ndikim nga politizimi nuk do të thotë të përjashtosh politikën. Kushdo që thotë të kundërtën gabon. Politika duhet të dijë të kuptojë ku është caku për sistemin gjyqësor. Jo sepse sistemi gjyqësor nuk duhet të preket, por për faktin e ndarjes së pushtetve. Ndërhyrja politike në mënyrë të drejtpërdrejt është e palejueshme. Këto ndëryrjet e fundit janë unike, si për KLD-në dhe për Shkollën e Magjistruaturës.
 
Përse i keni çuar këto dy ligje në Gjykatën Kushtetuese njësoj si me Partinë Demokratike?  
Unë nuk di arsye pse PD i ka çuar në Kushtetuese. Ligji për KLD-në cënon kompetencat kushtetuese të KLD-së, kompetencat e presidentit dhe funksionet e tij. Ligji i dytë, ai për Shkollën e Magjistraturës shkatërron këtë shkollë. Përshembull është futur një përfaqësues nga ministria e Arsimit, ky është instiutcion për formimin e prokurorëve dhe gjyqtarëve. Ekulibri në atë Këshill është ruajtur në mënyrë perfekte, në ligjin e ri nuk bëhet kjo, thyhet parimi i balancimit të pushteteve. Ajo shkollë kthehet në një shkollë që kontrollohet nga ekzekutivi. Ne akuzohemi se kemi vonuar emërimin e atyre që kanë mbaruar Shkollën e Magjistraturës, por ligji ndërpret formimin për magjistrat.
 
Jeni në krye të KLD-së, cfarë duhet të ndryshojë?
Kjo është pyetja e ditës. Duke qënë pesimisit për ndryshimet rrënjësore, mjafton të ulemi, të analizojmë ku i kemi problemet, sa është madhësia, si mund të rregullohet. Të bëjmë një reformë, duke mos e hedhur në erë me ligje të miratuara në errësirë. Duhet të ulemi e të diskutojmë me fakrorët para se ta vetojmë.
 
Kam dëgjuar nga juristë se sistemi i drejtësisë është një arnim, ju e pranoni këtë?
Nuk e pranoj këtë, unë them që është një sistem unik,  marrë nga disa sisteme.  Sistemi italian është më i ngjashëm me sistemin tonë. Jemi munduar ta përshtasim. Problemi kryesor tek ne është se nuk ka pasur një vullnet të qartë për të forcuar jo vetëm sistemi gjyqësor, por edhe KLD. Kur ne ërdhëm në këto detyra, nuk ishte bërë asgjë.
 
Më thoni një gjyqtar që është shkarkuar nga KLD?
Janë katër që kam shkarkuar unë. Një është kthyer sot nga Gjykata Kushtetuese, dhe jam i sigurt që e ka kthyer për një interpretim. Vetëm gjatë kohës time janë shkakruar 4 gjyqtarë, kemi marrë masa për 20 gjyqtarë, presim edhe masat e tjera për gjyqtarët e tjerë. Në Itali përshembull është ngjarje e jashtëzakonshme shkarkimi i një gjyqtari.


Redaksia Online
(a.h/g.f/shqiptarja.com)