Emërimet në administratë, PD
"I dënuari për drogë strehë në MB"

Partia Demokratike ka vazhduar me denoncimet mbi emërimet në adminstratë.  Zëdhënësja  e PD-së Laura Vorpsi  denoncoi emërimin një personi që sipas saj është me  precedent penal si bashkëpunëtor të Drejtorit për Rendin Publik.
 
“Administrata dhe Policia e Shtetit, janë bërë streha e sigurtë e personave me precedentë penalë dhe personave të dënuar për trafik droge.
Binak Dobrushi, i arrestuar në dhjetorin e vitit 2008 me rreth 2 kilogramë heroinë, i konsideruar si grosisti i rrjetit të drogës në Tiranë, drogë që përfundonte edhe në shkollat e fëmijëve tanë, i dënuar nga gjykata, është sot një nga bashkëpunëtorët më të afërt të Drejtorit të Rendit Publik në Ministrinë e Brendëshme. Me detyrën që ka në krah të Drejtorit të Rendit Publik, i dënuari për trafik droge, ka marrë sot me Edi Ramën, imunitetin dhe lehtësirat që i duhen për të ushtruar aktivitetin e tij”, ka thënë Vorpsi.  
 
Sipas PD kthimi i Shqipërisë në një laborator të madh droge, nuk është një zhvillim rastësor,  kjo ndodh, sepse në administratë, në poste kyçe, janë vendosur persona të arrestuar e të dënuar në të kaluarën për trafik droge.