Ermonela Jaho rikthehet në Tiranë 
 për të ndihmuar talentet e reja

Nën moton “Mendja nuk duhet të jetë një enë që mbushet, po një zjarr që ushqehet gjithmonë”, sopranoja me famë botërore Ermonela Jaho do të rikthehet në Teatrin Kombëtar të Operës dhe Baletit për të zhvilluar fazën e dytë të Kursit të Specializimit për Këngëtarë Lirikë” në datat 10,11 dhe 12 mars 2016.

“Ka kaluar pak më shumë se një vit nga fillimi i një cikli krejtësisht të ri në TKOB Albania dhe erdhi momenti të flasim për vazhdimësi”, pohojnë drejtuesit e TKOB. Pas kontributit dhënë në tetor të vitit 2016, Ermonela Jaho, artiste shqiptare e skenave botërore e nominuar së fundmi nga International Opera Awards në Readers'Award, do të rikthehet sërish pranë familjes për të vijuar më tej me masterklas-in.

Ermonela Jaho është ideatore e masterklasit “Kurs Specializimi për Këngëtarë Lirikë” dhe është mbështetur plotësisht nga Teatri i Operës për realizimin e këtij projekti. Në këtë institucion pohojnë se “Ermonela Jaho është e para artiste që ju përgjigj thirrjes e filozofisë “TKOBAP shtëpia e të gjithë artistëve shqiptarë të kudondodhur” duke kontribuar në kalendarin artistik të teatrit, dukuri që vijoi me pas edhe me pjesën më të madhe të artistëve të tjerë shqiptarë që e zhvillojnë karrierën e tyre jashtë vendit.

Ashtu sikurse edhe në fazën e parë, qëllimi i këtij projekti tepër të vlefshëm është të frymëzojë artistët e rinj e të ndihmojë në përgatitjen e përditshme të tyre për të arritur majat e shprehjes artistike.

Ky kurs specializimi është një mundësi e jashtëzakonshme për rritje artistike për artistë të rinj dhe studentë të artit lirikë, të cilët shumë shpejt mund të jenë potencial i gjeneratës së re pranë Teatrit.

Në kuadër të vazhdimësisë së projektit të parë, pjesëmarrësit në kurs, të cilët do të kenë mundësinë të punojnë me pianisten e institucionit Ardita Bufaj, do të jenë si më poshtë:

Zana Abazi
Ulpjana Aliaj
Denis Skura
Marina Kurti
Antonio Zefi
Ivana Hoxha
Enkelejda Kamani

Kursi i Specializimit do të finalizohet me një koncert në Hollin e TKOBAP, në datën 12 mars 2016, ora 19:00.
“S’na mbetet vetëm të falënderojmë Ermonelën për ndihmën e madhe qe po i ofron brezit të ri të artistëve dhe teatrit. Prezenca e saj mes tyre, është fat për këta të rinj”, pohojnë drejtuesit e TKOB.

Redaksia online
Shqiptarja.com