Evropa jugore pushtohet nga moti i ngrohtë

Moti i ngrohtë ka pushtuar pjesën jugore të Evropës dhe atë veriperëndimore të Afrikës, ndërsa gjatë ditëve në vijim pritet temperatura rekorde.

Në pjesë të Spanjës, Francës, Greqisë, Kroacisë dhe Turqisë, temperaturat priten të kalojnë mbi 40 gradë Celsius.

Në Itali është paralajmëruar për mot ekstrem në dhjetë qytete, përfshirë në Romë, Bolonjë dhe Firencë. Në këto zona është vlerësuar se temperatura mund të arrijë deri në 48.8 gradë Celsius.

LEXO EDHE:
Real Madrid ndryshon emrin e stadiumit

Më 11 korrik, mediat italiane raportuan se një 44-vjeçar po pikturonte vijat për kalim për këmbësorë në rrugë në qytetin Lodi, pranë Milanos, para se të rrëzohej nga vapa. Ai u dërgua në spital, ku më pas vdiq.

“Ne po përballemi me një valë të padurueshme të nxehtësisë”, shkroi në Twitter politikania italianë, Nicola Fratoianni.

“Ndoshta është momenti që, në orët më të nxehta, të merren të gjitha masat e dobishme për të shmangur tragjeditë si ajo që ndodhi sot në Lodi”, shtoi ajo.

Banorët e këtyre zonave janë këshilluar të pinë të paktën dy litra ujë në ditë dhe t’i shmangin kafenë dhe alkoolin, të cilat janë lëngje dehidratuese.

Një grup turistësh në rrugët e Romës i tha agjencisë së lajmeve Reuters se po përdornin spërkatës dhe ujë termal për ta freskuar veten.

“Ne po përpiqemi të mbijetojmë”, tha Mariko Desso, nga qyteti jugor i Barit.

Disa turistë janë rrëzuar shkaku i nxehtësisë jashtë Koloseut në Romë.

Vala e të nxehtit Cerberus – e emëruar nga Shoqëria Meteorologjike Italiane sipas përbindëshit me tre koka që shfaqet në Ferrin e Dantes – pritet të sjellë temperatura ekstreme gjatë ditëve në vijim.

Në Spanjë, gjatë ditëve të fundit, janë regjistruar temperatura deri në 45 gradë Celsius dhe temperaturat gjatë natës në pjesën më të madhe të vendit nuk kanë rënë nën 25 gradë Celsius. Disa pjesë të Majorkës mbetën deri në 37 gradë Celsius në orën 04:00 të mëngjesit të së enjtes.

Qeveria rajonale e Andaluzisë ka nisur një shërbim telefonik për njerëzit e prekur nga i nxehti. Ky shërbim ka raportuar se ka marrë 54.000 telefonata që kur u hap në fillim të qershorit.

Një imazh satelitor i regjistruar nga misioni Copernicus Sentinel i BE-së zbuloi se temperatura e tokës në rajonin Extremadura në Spanjë kishte arritur deri në 60 gradë Celsius më 11 korrik.

Nxehtësia pritet të vazhdojë edhe në fundjavë. Temperatura më e nxehtë ndonjëherë në Evropë, prej 48.8 gradë Celsius, ishte regjistrua pranë Sirakuzës në ishullin italian të Siçilisë në gusht të vitit 2021.

Një studim i Institutit ISGlobal thotë se 61.672 njerëz vdiqën në Evropë si pasojë e të nxehtit vitin e kaluar. Frika është se nxehtësia mund të shkaktojë shumë më shumë vdekje këtë verë.

Ekspertët thonë se periudhat e temperaturave ekstreme po bëhen më të shpeshta dhe ndryshimi i klimës bën që tani të jetë normale të regjistrohen temperatura rekorde.

Qendra Evropiane për Parashikimet e Motit tha se në nivel global, qershori i këtij viti ishte më i nxehti i regjistruar ndonjëherë./ REL.

TAG:
• evropa jugore
• greqi
• france
• turqi
• Kroaci
• spanje

Sondazhi i ditës:

Si ka qene per ju viti 2024?

• I mire

  43.9%

• I keq

  22.8%

• As i mire as i keq

  33.3%

Vota total: 1516

Votat totale janë unike

• Sondazhi i ditës:

  Si ka qene per ju viti 2024?

  I mire I keq As i mire as i keq