Iliri me të dy mbiemrat, (Meta edhe Metaj), dhe Monika me mbiemrin e saj, (Kryemadhi), janë modeli se si partia bëhet e familjes, se si i shërben familjes dhe se si e pasuron familjen. E si për ta përligjur këtë aksiomë, edhe kur burri u bë President i Republikës, gruaja hoqi peçovaslin vetëm dy muaj pasi qe emëruar kryetar, dhe u bë vetë pasardhësja e burrit. Pra, partia nga e burrin, u bë e gruas.
Dhe më tej; kur ky, pra kur burri Ilir me të dymbiemrat, njërin të dukshëm e tjetrin të fshehur iku nga President, përzuri gruan nga kryetare, dhe nuk e la as të fliste ndonjë fjalë përshëndetëse në konventën e LSI të 25 korrikut, dhe po vetë u vetëshpall kryetar i partisë që hyri në sallë si e lësëisë e doli nga salla si e lirisë, duke marrë me vete edhe taborrin e këshilltarëve që kishte kur qe president, të cilët i emëroi në udhëheqjen e partisë që doli nga salla. Vetëm ata, ardhësit që nuk ishin as anëtarë partie folën, të gjithë me rradhë; Blushi i Metës, Petraq Milo i Metës dhe Agim Nesho po i Metës. Të tjerë asnjë!
Po nejse se ky është problem tjetër dhe që ka të bëjë me demokracinë brenda asaj partie.
![](https://shqiptarja.com/template/img/NO_ALFA_Kuadrate shqiptarja.png)
Sot do të merremi me dukurinë më të shëmtuar të partive politike në Shqipëri që prej LSI-së në Partinë e Lirisë na vjen si dukuria e familjepartisë.
Meqenëse Iliri me të dy mbiemrat e tij (Meta dhe Metaj) dhe Monika me mbiemrin e vet (Kryemadhi) janë edhe burrë e grua, nuk duhej e nuk mund të ishin të vetëm si të tillë në krye të partisë, sepse ndryshe prishej rregulli brenda partisë.
E për ta bërë më atraktiv dhe më joshës modelin që edhe të tjerë çifte të turren drejt partisë së lirisë, çifti i parë Meta, Metaj - Kryemadhi, emëroi në dy funksione të larta çiftin tjetër Braimllari - Kërpaçi, të parin, Eriolin drejtor të kabinetit të kryetarit të partisë, pra drejtor të kabinetit të Ilirit me dy mbiemra, dhe të dytën, Floidën sekretare të marrëdhënieve ndërkombëtare. (Nuk janë ende zyrtarisht burrë e grua, por me gjasë do të jenë së afërmi dhe në famijepartinë e lirisë të gjithë e dinë se janë burrë e grua). Ndërsa Braimllarin tjetër, Endritin, kushëririn e parë të Eriolit e emëroi sekretar organizativ.
Kështuqë partia tani është në dorë të sigurtë. Dhe për këtë garant bëhet edhe vetë Agim Nesho, meqë vjen nga modeli i familjepartisë së babait të tij, Gaqos.
Sepse, partia e Gaqos që kishte sekretar organizativ të KQ të PPSh-së Hysni Kapon që ishte baxhanak ne Gaqon ( kishin gratë motra), por edhe gruan e Hysniut, Viton për shumë kohë presidente e bashkimit të grave të Shqipërise e më pas edhe ministre, siç kishte sekretar të parë në Tiranë Pirro Kondin që ishte kunat me Hysniun dhe Gaqon ( ishte vëlla me gratë e tyre, pra edhe me Viton e Hysniut), por kishte më pas edhe Xhelil Gjonin që ishtë burri i motrës së Hysni Kapos.
Pra modeli është i njejtë, nuk e kishte vetëm komunizmi familjepartinë.
Por nuk është vetëm kaq. Ka edhe me dhjetëra të tjerë ku burri dhe gruaja, kushërinjtë e kushërirat, krushqit dhe halla, teze, daja dhe xhaxhallarë, por edhe nipër e mbesa një dyzinë mbushin ashtu si dikur forumet drejtuese të LSI-së edhe komitetin organizator të partisë së lirisë.
Për të mos e zgjatur, e ardhmja e shqiptarëve është e sigurtë, mjafton të votojnë familjepartinë e lirisë të Ilir Metës.
Më falni, të Ilir Metajt. Sepse është me dy mbiemra…
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)