Fatos Hoxha: Të rinjtë “Xhaketa
gabi” të lara nga familja Berisha

TIRANE- Familja e Berishës përfshihet në debatin e zgjedhjeve të Partisë Demokratike. Pas akuzave që deputetja e PD-së Mesila Doda bëri për procesin e zgjedhjeve në strukturat e PD-së, djali i ish-kryeministrit Shkëlzen Berisha komentoi mbi qëndrimin e Dodës duke ironizuar postimin e saj dy ditë më parë në “facebook”. “Për disa në opozitë thumbat për Aldon vlekan më shumë se sa për ato të kundërshtarit”,- shkroi Shkëlzen Berisha. Por qëndrimet e tij në rrjetin social gjetën edhe kundërpërgjigjen e deputetes Mesila Doda.

Sërish nëpërmjet një postimi në faqen e saj në rrjetin social, Doda theksoi se është e rëndësishme që në zgjedhjet e PD të respektohet kriteri i ndarjes së mandateve. “Të dashur miq, shoh që statusi im ka ngjallur shumë interes dhe kjo është diçka e mirë besoj unë, pasi sjell veç mirë kur gjërat thuhen edhe nëse janë gabim apo disa i mendojnë si të tilla. Nuk ka qenë dhe nuk do jetë qëllim goditja e emrave të përveçëm as e zotit Mziu dhe aq më shumë e kolegut tim Bumci. Është e rëndësishme që të respektojmë kriteret dhe kriteri i ndarjes së mandateve nëse u fut si risi do duhej të respektohej për këdo dhe në çdo nivel. Kaq për thelbin e mesazhit që gjithsesi nuk ishte kaq serioz sa e trajtua. Shpresoj që në të ardhmen mesazhe të tilla mos të sjellin kaq shumë sëkëlldisje”, komenton Doda.

Fatos Hoxha
Krahas debatit Doda-Shkëlzen Berisha, lidhur me zgjedhjet në Partinë Demokratike ka reaguar edhe ish-deputeti Fatos Hoxha. Edhe ky në një postim në faqen e tij në “facebook” theksoi se xhaketat e reja në PD janë të njëjta me xhaketat e vjetra, madje më keq. “Për më qartë, në lidhje më të zgjedhurit e PD-së në rrethe, i pyetur para rreth një muaji në “in box” kam thënë se: Të zgjedhurit e rinj nuk kanë ndonjë ndryshim me xhaketat e vjetra të PD që përmendni ju, nëse vazhdojmë në këtë linjë, të xhaketave, atëherë unë do t’i quaja “xhaketa gabi”, të pastruara në DRY CLEAN-in e familjes, dhe që Berisha kërkon të na i shesë si “mall firmato”.

Përsa u përket të zgjedhurve në Tiranë jam shprehur që: Nuk i njoh. Pavarësisht se ndonjërit prej tyre, i vjen era alkool deri në fb-në tim, apo “zhurma e daulles” së korrupsionit të ndonjë tjetri, ka çare veshët e shqiptarëve”,- shkroi Hoxha në faqen e tij në “facebook”.

Shkrimi u botua në Shqiptarja.com (print) në 10 Gusht 2014

Redaksia Online
(d.a/shqiptarja.com)