Partia Demokratike ka reaguar pas deklaratës së ministres së Drejtësisë Etilda Gjonaj e cila përgënjeshtroi një lajm që qarkullon në disa media sipas të cilit ajo shpenzon 700 euro në natë për të qëndruar në një dhomë hoteli në udhëtimet jashtë vendit. Gjonaj tha se kjo faturë është prerë për të gjithë delegacionin dhe se kanë qenë dy net qëndrimi në një hotel.

Përmes ish-deputetes Albana Vokshi, PD deklaron se dhoma e luksit që ka shkaktuar 700 euro është në emrin e ministres Gjonaj dhe është dhomë teke, dhe i gjithë delegacioni nuk mund të akomodohet në këtë dhomë.

"Biletat nxjerrin genjeshtare Etilda Gjonajn. Ministrja ka paguar 700 euro per 1 nate, per 1 person, per 1 dhome.

Reagimi i Etilda Gjonit për hotelet luksoze me çmime sheikësh, ku qendron gjatë vizitave zyrtare, tenton të bëjë shqiptarët për budallenj.

Faturat janë të shkruara e zeza mbi të bardhë.

Dhoma e luksit me 700 euro nata:

1. Është në emrin e Ministres së Drejtësisë, Etilda Gjonaj.

2. Është dhomë teke.

3. Është dhomë e paguar për 1 person, ku, normalisht, nuk mund të gjente strehë gjithë delegacioni, siç mashtron ministrja e Edi Ramës.

Edhe kontrollin e brendshëm e ka porositur sa për të larë duart me opinionin publik, që e refuzon luksin e qeverisë së vendit më të varfër në Europe! Askush nuk e ka detyruar Etildën të zgjedhë hotele me 5 yje gjatë vizitave të saj, vizita të cilat nuk rezultojnë në kohë bumi turistik, që Etilda të mos gjejë një dhomë të zakonshme, pa shumë luks dhe komoditete të tjera speciale.

Dhe, së fundi, zonja ministre e një qeverie hajdute gënjen edhe për kohën e publikimit të lajmit, i cili është shpërndarë parmbrëmë, jo para 24 orësh, siç përpiqet të mashtrojë Etilda, në mënyrë që të justifikojë heshtjen e gjatë për shpenzimin e parave publike si t’i kishte fituar në bixhoz", deklaron Vokshi.

Dokumentet e publikuara nga PD