Festivali/ Minarolli e Ajazi garë
mes 156 filmave në “Giffoni” në Itali

TIRANE- Dy filma të rinj shqiptarë, të dy regjisorëve Artan Minarolli dhe Namik Ajazi janë pjesëmarrës në festivalin “Giffoni” që po mbahet këto ditë në Itali. Të dy filmat kanë ngjallur shumë kureshtje e diskutime përsa i takon mesazheve që përcillnin. Filmi i Minarollit “Skuadra”, një film 18 minutësh, rrëfen përpjekjet e një grupi fëmijësh për të gjetur një vend për të luajtur në xhunglën e kryeqytetit, ku gjithkund ka makina të parkuara, dhe ndërtesat kanë mbirë kudo, duke pushtuar çdo hapësirë publike.

Ndërsa kërkojnë e kërkojnë pa fund një vend për të luajtur, më në fund gjejnë një parking të shkretë dhe vendosin të ndalojnë e të luajnë aty. Problemet nisin ku roja i parkingut i pavëmendshëm ndaj pranisë së fëmijëve aty, e mbyll parkingun dhe fëmijët detyrohen të kalojnë aty gjithë natën….

Ndërsa filmi tjetër “Amaneti”, i pari me metrazh të gjatë i regjisorit Namik Ajazi është prezantuar në Giffoni me titullin “The last wish” (Dëshira e fundit). Filmi rrëfen Shqipërinë e viteve ’80, ku në udhëheqjen e lartë komuniste kishte plasur bomba e tradhëtisë së Mehmet Shehut. Nisur nga kjo ngjarje, Rruzhdi Pulaha ka ndërtuar skenarin, ku intriga fshihet pas një inçizimi që ish-kryeministri ia kishte lënë në dorë djalit të tij dhe ky i fundit synon ta shfaqë në një televizion italian.

Një film që zbërthen përmes mjeteve artistike një copëz histori të veshur me mister edhe sot. “Amaneti” u shfaq shikuesve dimensionet e frikshme të ferrit komunist.
Dy filmat e regjisorëve Minarolli e Ajazi u shfaqën në “Teatrin Lumier” me 21 korrik, në kategorinë jashtë konkurrimit në hapësirën dedikuar kinemasë shqiptare me titullin “Focus Albania”.

Giffoni shënoi këtë vit edicionin e 45-të dhe shënon në programin e tij shfaqjen e 156 filmave nga të cilët 92 janë në konkurrim.  Juria e këtij viti përbëhet nga 3600 të rinj të cilët vijnë nga 50 vende të ndryshme të botës. Mes filmave në konkurim dhe artisve në ethet e garës, programeve të pasura  dhe aktiviteve të shumta, Gifolli 2015 I cili nisi me 17 korrik do të vijojë deri natën finale me 26 korrik 2015. 


Shkrimi u botua në Shqiptarja.com (print) në 24 Korrik 2015

Redaksia Online
(d.a/shqiptarja.com)