Fier, makina bie në lumë
vdes shoferi 25 vjeça

FIER - Njjë 25 vjeçar humbi jetën  një orë pas mesnatës në aksidentin e ndodhur ne vendin e quajtur “Ura e Mbrostarit” rreth 2 kilometra larg qytetit të Fierit.

Rreth orës 01.00 duke u gdhirë dita e sotme 25 vjeçari fierak Marius Hatija, ka qenë duke drejtuar makinën me targa AA 143 GG, kur ka humbur kontrollin dhe pasi është përplasur me parmakët e urës ka rënë nga një lartësi mbi 8 metra në lumin e Semanit.

I riu udhëtonte i vetëm, dhe po kthehej për në banesën e tij në lagjen Mbrostar. Disa dëshmitarë kanë parë aksidentin dhe kanë njoftuar policinë.

Është dashur një mjet tip vinç, për të ngritur lart  mjetin mbi urë dhe me pas 25 vjeçari është nxjerrë nga makina me vështirësi. Nga hetimet e para mendohet se i riu gjeti vdekjen nga përplasja e fortë me parmakët e urës.

Viktima është çuar në morgun e qytetit dhe pas ekspertizës mjeko ligjore është tërhequr nga familjaret. Ende nga policia nuk është nxjerrë zyrtarisht shkaku i këtij aksidenti të rëndë ku humbi jetën Marius Hatija. Pista e parë e hetimit është humbja e kontrollit nga drejtuesi i mjetit.

(Foto: Makina e aksidentuar)
Redaksia Online
(b.m/shqiptarja.com)