Fier/ Shuhet zjarri në kodrat me ullinj në fshatin Jarua, flakët rrezikuan banesat! Digjen 10 ha ullishte

 

Në orët e para të mëngjesit të sotëm, në fshatin Jarua të Fierit është bërë e mundur shuarja e zjarrit, që rrezikoi banesat dhe alarmoi banorët që nga mesdita e djeshme.

Zjarrfikësit kanë vijuar edhe gjatë natës betejën e tyre me flakët, të cilat “pushtuan” kodrat me ullinj dhe shkurre të fshatit Jarua.

Mësohet se nga zjarri ka djegur mbi 10 hektarë ullishte, ndërsa banesat të cilat u rrezikuan nga flakët që u përhapën me shpejtësi nuk kanë pësuar asnjë dëmtim.

Zjarri në këtë zonë shpërtheu mesditën e djeshme, duke shkaktuar edhe disa shpërthime të municionit luftarak që kishte mbetur në tokë që nga koha kur zona kishte qenë repart ushtarak.

Më vonë, të favorizuara nga era flakët janë përhapur në një territor të gjerë duke dëmtuar sipërfaqe të konsiderueshme me ullishte, shkurre dhe hamulla.

Flaket u janë afruar edhe banesave, ndërkohë që ndërhyrja e shpejtë e zjarrfikësve të Fierit, Albpetrolit , Patosit e Roskovecit  bënë të mundur fikjen e zjarrit në orët e para të mëngjesit të sotëm

Lajmi kryesor:

Del jashtë kontrollit zjarri në kodrat te Kepi i Stillos deri në Katajeto në Konispol, digjen dhjetra ha pyje! 2 zjarrfikëse punojnë për shuarjen e flakëve

M.T/KT/Shqiptarja.com

TAG:
• Fier
• Zjarrfikësit
• zjarr