Filmi Europian, më 5 maj në Tiranë
regjisori italian Marco Bellocchio

TIRANE - Sot në kinema Milenium çelet Festivali i Filmit Europian në Shqipëri, i cili do të vijojë deri më 8 maj. Organizatorët pohojnë se gjatë këtyre ditëve do të shfaqen 14 filma, nga 10 shtete anëtare të BE-së, çdo ditë në orët 18.00 dhe 20.30. Ndërsa në datën 5 maj do të jetë i pranishëm edhe regjisori i njohur Italian Marco Bellocchio, filmi i të cilit, “Vincere” do të projektohet në orën 20.30, siparin e festivalit e çel filmi danez, “In a Better World”, fitues i Oskarit dhe Golden Globes 2010, si filmi më i mirë i huaj apo “Wintertochter “, fitues i disa çmimeve në Gjermani dhe në Feature Film Chicago 2011.

Të tjerë filma, ndër prodhimet më të mira të viteve të fundit, që do të shfaqen gjatë këtij festivali janë “Der Ganz Grobe Traum”, (“Leksione për një ëndërr”), “Welcome” dhe “25 kilates”, “Tales from the golden age”, “Tutta colpa della musica”, “Mariage a trois”, “Ëintertochter “ si dhe dokumentari “Armadillo”. “In a better world” me regji të Susanne Bier dhe skenar të Anders Thomas Jensen dhe Susanne Bier do të shfaqet në orën 18.00 dhe zgjat 119 minuta.

Pas tij në orën 20.30 do të shfaqet “Der Ganz Grobe Traum” është një film gjerman me regji të Sebastian Grobler, i cili ka shkruar edhe skenarin së bashku me Philipp Roth. Të tjerë filma si “Welcome” i regjisori Philippe Lioret, “25 kilates”: trilleri 86 minutësh spanjoll, filmi grek Guiness”, filmi belg “The intruder”, filmi anglez “Attack the Block”, filmi holandez “Sonny Boy” dhe disa nga legjenda urbane të Rumanisë të dramatizuara në filmin “Tales from the golden age”, etj, do të shfaqen në ditët në vijim në kinema Milenium në Tiranë.

(dhh/im/shqiptarja.com)