FINLANDË – Të gjelbërit largohen nga qeveria për shkak të ndërtimit të një centrali bërthamo

HELSINKI, 18 shtator /ATSH-AFP/ - Të gjelbërit finlandezë njoftuan sot largimin e tyre nga qeveria për shkak të mosmarrëveshjeve të shfaqura nga ekzekutivi përsa i përket një projekti të centralit bërthamor që do të ndërtojë kompania ruse "Rosatom".
Të gjelbërit u shprehën kundër këtij centrali bërthamor në Pyhajoki, në bregun perëndimor të vendit, që do të shfrytëzohet nga grupi bërthamor finlandez "Fennovoima", të cilit qeveria ka dhënë autorizimin e saj.
"Jam shumë i trishtuar dhe i zhgënjyer (...) propozoj që ne të largohemi nga qeveria të shtunën", konfirmoi për shtypin në Helsinki drejtuesi i të gjelbërve dhe ministri i Mjedisit, Ville Niinisto.
Të gjelbërit duhet ende të konfirmojnë vendimin nëpërmjet një votimi, që duket një formalitet duke ditur fuqinë me të cilën ata kanë kritikuar projektin, jo vetëm sepse ata janë kundër zhvillimit të programit bërthamor, por gjithashtu për shkak të pranisë së Rosatom, distributor i centralit dhe aksioner me 34 për qind i Fennovoimas.
Kryeministri konservator, Alexander Stubb e cilësoi projektin "Fennovoima" si shumë të rëndësishëm dhe hodhi poshtë kritikat e ngritura nga pjesëmarrja ruse.
"I kuptoj shqetësimet, por siguroj se do të reagojmë konform ligjeve finlandeze", theksoi ai në një konferencë shtypi.
Në muajin korrik 2013, Fennovoima kishte zgjedhur Rosatom për ndërtimin e centralit, ndërkohë që kjo shoqëri nuk bënte pjesë në listën e furnizuesve potencialë në vitin 2010./
/ec/  a.jor.