Flávio Bolsonaro, djali i ish-presidentit brazilian Jair Bolsonaro, është larguar drejt Shteteve të Bashkuara, ku synon të organizojë opozitën kundër presidentit Luiz Inácio Lula da Silva. Pas mbërritjes në Miami, senatori i krahut të djathtë publikoi një letër, ku falënderoi presidentin amerikan Donald Trump për mikpritjen dhe pretendoi se po përballet me persekutim politik në Brazil.

“Unë nuk u arratisa nga Brazili, u largova për hir të Brazilit”, deklaroi Bolsonaro, duke këmbëngulur se do të vazhdojë betejën politike nga jashtë vendit dhe se synon të mbrojë familjen e tij.

Në letrën publike, ai përsëriti gjithashtu akuzat për manipulim të zgjedhjeve në Brazil, por pa paraqitur prova që t’i mbështesin ato.

Sipas të dhënave të fluturimeve, Flávio Bolsonaro udhëtoi së bashku me bashkëshorten dhe dy vajzat nga Argjentina drejt Ekuadorit, për të vijuar më pas me avion privat drejt Miamit. Ndërkohë, autoritetet braziliane kanë anuluar dokumentet e udhëtimit, ndërsa avokatët e tij fillimisht deklaruan se nuk e dinin vendndodhjen e tij.

Largimi drejt SHBA-së vjen në një moment të vështirë për senatorin, i cili është nën hetim në dy çështje që shqyrtohen nga Gjykata Supreme Federale e Brazilit. Njëra lidhet me dyshime për parregullsi në transferimin e rreth 70 milionë dollarëve drejt kompanisë së filmit Dark Horse, që po realizon një film biografik për të atin. Hetimi tjetër lidhet me dyshime për pastrim parash. Flávio Bolsonaro i mohon akuzat, të cilat mbeten ende nën hetim.

Ky zhvillim rikthen vëmendjen te marrëdhëniet e familjes Bolsonaro me Shtetet e Bashkuara. Jair Bolsonaro u largua drejt Floridës në dhjetor të vitit 2022, përpara se Lula të merrte zyrtarisht detyrën si president.

Ai u dënua më vonë me 27 vjet burg në një çështje që lidhej me përpjekjet për grusht shteti. Edhe vëllai i Flávios, Eduardo Bolsonaro, jeton në SHBA, ku është përfshirë në përpjekje për të ndikuar te zyrtarët amerikanë lidhur me çështjen gjyqësore të të atit.Tashmë, mbetet për t’u parë se si do të ndikojë qëndrimi i Flávio Bolsonaro në SHBA në përballjen politike me presidentin Lula dhe në zhvillimet e ardhshme politike në Brazil.