Forcat izraelite qëllojnë për vdekje dy të rinjtë palestinezë! Shkon në 12 numri i të vrarëve për këtë vit, mes tyre 3 të mitur

Trupat izraelite kanë qëlluar për vdekje dy palestinezë në Bregun Perëndimor të pushtuar gjatë një bastisjeje të ushtrisë pranë një qyteti. Dy të rinjtë, Ezzedine Bassem Hamamreh, 24 vjeç dhe Amjad Adnan Khaliliyeh, 23 vjeç u vranë të shtunën gjatë një sulmi në fshatin Jaba, në jug të Jeninit, shkruajnë mediat e huaja.

Grupi i Xhihadit Islamik Palestinez tha se Hamamreh dhe Khaliliyeh ishin anëtarë të tij. Në një deklaratë, grupi dënoi vrasjet, duke i përshkruar dy burrat si dëshmorë heroikë.

Ai tha se ata u vranë ndërsa përpiqeshin të ndërhynin kundër forcave izraelite.

Më herët një tjetër palestinez, 19-vjeçari Yazen Samer Ja'abari, vdiq nga plagët që mori kur u qëllua nga forcat izraelite më 2 janar. Ja'abari u plagos në fshatin Kufr Dan afër Jeninit gjatë një bastisjeje të ushtrisë, në të cilën u vranë dy palestinezë të tjerë.

Vdekjet e fundit e çojnë në 12 numrin e palestinezëve të vrarë këtë vit nga forcat izraelite në Bregun Perëndimor, të pushtuar nga Izraeli që nga viti 1967. Mes viktimave kanë qenë edhe tre të mitur. Prej një viti ushtria izraelite ka zbatuar një fushatë aksionesh dhe operacionesh në këtë zonë.

B.V/Shqiptarja.com

TAG:
• Izrael
• Palestine