Foto/ ​PD denoncon disa raste 
të manipulimit të zgjedhjeve

TIRANE -Në një deklaratë për shtyp të zëdhënëses së Partisë Demokratike Oriola Nebiaj janë denoncuar disa raste, ku sipas PD-së kemi të bëjmë me tentativë për manipulimin e procesit zgjedhor të 21 qershorit.

PD akuzon se, “në minibashkitë e Tiranës të drejtuara nga socialistët, konkretisht në qendrën e votimit 1683 dhe 1683/1, janë regjistruar 278 votues, të cilët banojnë e jetojnë në lulishte. Vendi i banimit të këtyre banorëve është zyrtarisht me letra, një lulishte. Këtë e tregon dhe kjo hartë që po paraqesim sot para jush”.





Ndërsa, sipas PD-së “në Kolonjë strukturat e PS dhe LSI janë sulur me kamionë me ndihma, dhe në mes të qytetit shpërndajnë miell e vaj në këmbim të votave”.

Në Vorë e cila është një “pikë e nxehtë” e këtyre zgjedhjeve, PD thotë se, “strukturat shtetërore dhe kriminale të Ilir Metës kanë rrethuar shtabin e kandidatit Ismailaj, ku shantazhohet e shoqërohet çdo qytetar që hyn e del nga aty”.

Në Durrës, PD thotë se, “personat e shpallur në kërkim nga policia për ngjarjet e rënda në Sukth, janë çdo ditë në krah të kandidatit Dako në takimet e tij elektorale”.



Në Sarandë, “nënkomisari Artan Alinani në Sarandë dhe oficeri i policisë, shef i linjave, Shkëlqim Bello, të dy në krah të kandidatit të qeverisë për Delvinën, Rigers Balili”.



Në Tiranë, “një zyrtare e lartë e Interpol Tirana, Irma Bime, e përfshirë në mënyrë shumë aktive në fushatën e Erion Veliajt, e cila shfaqet në dhjetëra foto të takimeve të kandidatit të Ramës”.

Duke i cilësuar këto raste flagrante të shkeljes së Kodit Zgjedhor dhe standardeve të zgjedhjeve, PD i ka bërë thirrje Prokurorisë të hetojë e të garantojë zbatimin e ligjit dhe vënien para përgjegjësisë të autorëve. Gjithashtu, PD i kërkon Ambasadës së Shteteve të Bashkuara, OSBE-ODIHR dhe përfaqësuesve të vendeve të BE, të rrisin monitorimin e të regjistrojnë këto ngjarje që dëmtojnë standardet e zgjedhjeve.

Redaksia Online
(f.s/shqiptarja.com)
 

TAG:
• OSBE
• OSBE-ODIHR